Тыва үндезин культура төвүнге Тываның салым-чаяанныгларның бирээзи, “Тыва Республиканың улустуң ус-шевери болгаш Мергежилдиң тергиини” деп хүндүлүг аттарның эдилекчизи, “Алдын торгу” деп ательениң хоочун даараныкчызы Алдын Хомушкунуң чогаадыкчы ажыл-ижинге тураскааткан байырлыг кежээзи болуп эрткенин төп дыңнаткан.
Оюн-көргүзүг кежээзинге Алдын Кечиловна бодунуң даарааны тыва чоннуң кышкы, часкы, чайгы, күскү үелерде кедип чорааны хеп-сынның хевирлерин таныштырган. Ус-шеверниң чоок кижилери, чаңгыс чер чурттуглары, кады ажылдап чораан эш-өөрү чыглып, ооң чогаадыкчы ажыл-ижиниң үре-түңнели болур кежээзин сонуургап, чылыг-чымчак байырын чедиргеннер.
Тываның улустуң ус-шевери үжен чыл бурунгаар кожууннарже сургакчылап тургаш, улуг өгбелерден болгаш шыырак даараныкчы угбайлардан айтыртынып, шиңгээдип тургаш, үндезин тыва хепти камгалап алыры-биле улуг ажылды чорудуп келген.
Төптүң удуртулгазы бо хүнде бодунуң алдын үүже ышкаш арга-дуржулгазын, билиглерин аныяк-өскенге, дааранырынга сундулуг, сонуургалдыг шеверлерге, чонга дамчыдып бергени дээш четтиргенин илереткен.
