Улуг-Хем кожуунда кыштаглаашкын эки эртип турар

Улуг-Хемде кыштаглаашкын эки эртип турарын чагырга чери дыңнаткан. Кожуунда 203 кыштаг бар.

Кыштаглаашкынны хүр эртери-биле 17564 тонна сигенни кезип белеткээн турган. Мал-маганны хүндүс оъткарып, кежээки үеде сигеннедип турарындан сигенниң курлавырының 70 хуузу бар. Садыг-саарылга черлеринде мал чеминге ажыглаар аңгы-аңгы тараа болгаш чарба, холуп каан тускай мал чемин садып турар. Кожууннуң курлавыр фондузунга 100 тонна мал чемин белеткээн.

Кожуун девискээринде бо кыжын харның кылыны 15-20, тайга эдээ черлерде 20-25 сантиметр чедип турар. Малчын коданнарже оруктар ажык, ук айтырыг көдээ ажыл-агый эргелелиниң хайгааралында. Хар чагган соонда оруктарны тус чер чагыргаларының болгаш малчыннарның күжү-биле үстүрүп турар.

Көдээ ажыл-агый эргелелиниң тускай мергежилдиглери биле мал эмчилери мал-маганның байдалын доктаамал хынап, көдээ ишчилерге практиктиг дузаны көргүзүп, тайылбыр ажылын чорудуп турар. Октябрь 1-ден бо хүннерге чедир 121 кыштагны кезип хынаан. Чаа чылдың байырлалдар хүннеринде 46 кыштагны эргий кезээн. Малчыннарның байдалы эки, одаар ыяжы, хөмүрү бар. Чамдык малчыннар ыяжын камнап, көржең оттулуп турар.

Кожуунда бөрүлер саны көвүдээни улуг дүвүрээзинни тургускан. Көдээ ажыл-агый эргелелиниң даргазы Б.К. Ховалыг аңчы бригадалар-биле сүмележип, бөрү аглаарынга кывар-чаар материалды үндүрүп берип турар.

Эрткен чылдың декабрь 18-ке чедир аңчы бригадалар 30 кокайны узуткаан. Декабрьның сөөлгү хонуктарында ийи бөрүнү аткан.