Шагаан-Арыгның культура төвүнге Ада-чурт камгалакчызының чылын түңневишаан, Россияда чоннарның чаңгыс деминиң чылын байырлыг байдалга ажытканын чагырга чери дыңнаткан.
Улуг-Хем кожуун Ада-чурт камгалакчызының чылында аңгы-аңгы хемчеглерни эрттирип, тускай шериг операциязында дайынчы даалгаларын күүседип турар оолдарга ачы-дуза чыылдазынга доктаамал киржип турганын чагырга чери дыңнаткан.
Ада-чурт камгалакчызының чылын түңнеп тура, кадыкшылының байдалы-биле халашкан дайынчыларны, маадырлыы-биле амы-тынындан чарылган оолдарның аваларын болгаш кожуунда тургустунган эки турачы отрядтарның ажыл-чорудулгазын, акцияларга идепкейлиг киржип турар малчыннарның ачы-буянын демдеглеп, чоннуң демниг чоруунуң ачызында 2025 чылда хөй ажыл кылдынганын кожууннуң удуртулгазы айтып, идепкейжилерни шаңнап-мактаан.
Шагаан-Арыг хоорай чагыргазының удуртулгазы хоорайда тургустунган «Бодаган», «Тайбың», улуг назылыгларның «Сорунза», «Ангелдер» деп эки-турачы отрядтарынга ачы-буян акцияларын организастаарынга улуг үлүг-хуузун киириштирип чорууру дээш беш муң акшаның сертификаттарын тывыскан.
ТР-ниң Дээди Хуралының депутаттары Буян Биче-оол биле Мөңге Тагба халажылгада дайынчыларга «Ада-чурт камгалакчызынга» деп медальды тывыскан.
Кожуннуң эки турачылары болгаш идепкейжилери хемчегге чыглып, өөредиглиг кичээлдерни эрттирген.
Эйлиг-Хемниң идепкейжилери чылыг уктар аргып турар хой дүгүн канчаар ээрерин, чылыг чеңи-чоктар даараарын, балыгланган дайынчыларга билектээш өрүүрүн көргүскен. Арыг-Бажының башкылары өөреникчилер-биле кады оңгу иштинге ажыглаар лааларны кылган. Дайынчыларга камгалал бичии кымчыларны делгээн.
Хайыраканның энелери чажыртынып шыптынар четкилерни кылырын көргүскен. Олар 200 ажыг «четкини» чоруткан. Арыг-Үзүүнүң эки турачылары дайын шөлүнге арыгланыр, чоттунар чүүлдерни белеткээн. Шагаан-Арыгның төлээлери боттарының аргаан уктарын, бөрттерин эккелген. Ийи-талчылар соктаан тараа, далганын, торгалыгжылар аъш-чемин делгээн.
Эрткен чылын улуг-хемчилер чаңгыс демин көргүзүп, дайынчыларга 634300 рубльди чыып, ачы-дуза чыылгазынга идепкейлиг киришкен.
Кожууннуң чонну ажылга хаара тудар төвүнүң ажылдакчылары тускай шериг операциязындан халажып келген дайынчыларга, инвалидтерге ажылга тургустунуп алырын сүмелеп, буклеттерни үлээн.
