Улуг-Хемде 600 ажыг тонна сигенни кезип, мал чемин белеткээн

Бо чылын Улуг-Хемниң 16 арат ажыл-агыйы мал чемин четчир кылдыр белеткээр дээш медени, тараа культураларын тараанын чагырга чери дыңнаткан.

2024 чылда сигенни 17564 тоннаны белеткээр план салдынган. Көдээ ажыл-агый бүдүрүлгелери 712 тоннаны, арат ажыл-агыйлар 8260 тоннаны, хууда дузалал ажыл-агыйлыг чурттакчы чон 8542 тоннаны база албан черлери 50 тоннаны белеткээр.

Бо чылын араттар көдээ ажыл-агый хөгжүдер тускай программа езугаар ийи «МТЗ 82.1» маркалыг тракторну, сиген кезер, бөлер, дүрер, чүдүрер дээш шупту кожар херекселдер-биле чепсегленген. «Агростартап» программазы-биле база трактор, техникага кожар дериг-херекселдерни алган.

Мал чеминге ажыглаар тараа культураларын болгаш медени 1653 гектарга, эрткен чылга деңнээрге, 170 гектар хөйнү тараан. Чайгаар үнген сиген 5308 гектарда, хөй чылдыг тарымал сиген 220 гектарда үнген. Чаңгыс чылдыг сиген 1433 гектарда. Ниитизи-биле кожуунда мал чемин белеткээр 7382 гектарда сиген болгаш тараа культуралары үнген.

Бо хүннерде кожуун девискээринде 600 ажыг тонна сигенни кезип белеткээн. Сигенниң бедии 30-40 сантиметр, чамдык черлерде тайыс үнген, бедии 10-15 сантиметр, ынчалза-даа эрткен чылгы хемчээл-биле алырга, эки үнген черлер база бар. Улуг-Хем унунда ортулуктарда база кожууннуң барыын талазында 16 бригадада 43 кижи сиген кезилдезинче кирген, 38 техника хаара туттунган.