Шагаан-Арыгның культура төвүнге кожууннуң хоочуннар чөвүлелиниң болгаш пенсионерлер эвилелиниң отчет-соңгулдалыг хуралы болуп эрткенин чагырга чери дыңнаткан.
Тываның Хоочуннар чөвүлелиниң даргазы Сагаан-оол Долгар, Мария Шожукпан, Улуг-Хем кожууннуң чагыргазының даргазы Эрес Мандан-оол, ооң социал политика талазы-биле оралакчызы Аржаана Даржаа, күш-ажыл болгаш социал хөгжүлде эргелелиниң даргазы Чойгана Сенди хуралга киришкен.
Хуралдың бирги айтырыы – 2024 чылдың база 2025 чылдың алды айының отчеду. Кожууннуң хоочуннар чөвүлелиниң болгаш пенсионерлер эвилелиниң даргазының оралакчызы Клара Төгүс-оол чөвүлелдиң кылып чоруткан ажылын таныштырган.
Ийиги айтырыг – чаа составты соңгууру. Маңаа хоочуннар идепкейлиг, шалыпкын, организакчы кижилерни ажык бадылаашкын-биле соңгуп алганнар. Чөвүлелдиң удуртукчузунга Өнер Натпитти чаңгыс үн-биле бадылаан.
Эрес Мандан-оол чону дээш сагыжы аарып чоруур холу туттунгур, кашпагай, идепкейжи «алдын фонд» дижиривис хоочуннардан хөйнү өөренип, арга-сүмезин дыңнап, сырый харылзаалыг кады ажылдаарын аазаан. Ол хөй-ниити ажылынга идепкейлиг хоочуннарны шаңнаан.
Тываның хоочуннар чөвүлелиниң даргазы национал чоргаарал дугайында аныяк-өскенге, уругларынга, уйнуктарынга өөредирин, тыва дылывысты чидирбезин чагып, национал культуравысты бедидерин энелерге чагаан.
Отчет-соңгулдалыг хуралды Мария Дамчай удуртуп эрттирген. Аңаа спортчу болгаш культурлуг хемчеглерге эки киришкен чөвүлелдерни, "мөңгүн эки турачыларны", "Өг-бүлениң шыгжамыры" төлевилелге киришкен эрес-кежээ ногаажыларны сумулар аайы-биле шаңнаан.
Чаа соңгуткан Өнер Васильевна хуралды организастыг эрттирип берген эрги составка четтиргенин илереткен.
«Дембилдей» бөлүүнүң бичии артистери, «Он-Кум» студиязының даңгына кыстары ыры-хөгжүмүн, танцы-самын бараалгаткан.
Төп эмнелгениң профилактика салбырының эмчилери хоочуннарның ханының базыышкынын, чигирин, карааның базыышкынын хынаан.
