Улуг-Хем кожууннуң Ийи-Тал сумузундан Меңги биле Айлуна Манзырыкчылар кожуун чергелиг «Үлегерлиг малчын өг-бүле» мөөрейниң тиилекчилери болганын чагырга чери дыңнаткан. Олар ам республика чергелиг мөөрейге кожуунун төлээлээр.
Аныяк малчын өг-бүлениң ук- төөгүзү шаандан тура чылгычы база муңчу малчыннар. Меңги Манзырыкчының ачазы хөй малдыг билдингир чылгычы чораан. Өгнүң эр ээзи чажындан тура малга ынак, эмдик аъттар өөредир, чарыш аъды мунар, чүгүрүк аъттарлыг кижи.
Айлуна Манзырыкчы – Ийи-Талда аграр школа-интернатта эге класс башкызы. Ол хамнаарак дег уян үннүг ыраажы. Манзырыкчыларның ийи кызы Ай-Чырыы, Ария база авазы ышкаш ырлаар салым-чаяанныг. Школазының шылгараңгай тергиин өөреникчилери.
Өг-бүлениң чүгүрүк аъды республика, кожуун чергелиг чарыштарга эртип, шаңналдыг черлерже кирип турар. Ук-ызыгуурундан салгал дамчып келген малчын өг-бүле чылгызын, хууда мал-маганын Ийи-Талдың аяң шыктыг, хөлбең оъттуг, тайга эзимнерлиг, кат-чимистиг Барык, Чээнек деп черлеринде одарладып, азырап чоруурлар.
Итпек-хойтпаан бээр инектерлиг, хоюг дүгүн бээр өшкү-хойлуг, чыраа-саяан көөр чылгы малдыг Манзырыкчаларның өг-бүлези – төлептиг малчыннар. Олар мал-маган тудуп чоруурундан аңгыда салым-чаяанныг, спортчу, идекпейжи өг-бүле. Аңгы-аңгы мөөрейлерге, маргылдааларга кожуунунуң, суурунуң адын төлептиг камгалап, шаңналдыг черлерни чаалап ап турарлар.
