ТР-ниң ММА федерациязы Тывада “Ниити-российжи улусчу фронтунуӊ аныяктары” командазы-биле демнежип, республиканың бирги чери дээш дайынчы спорттуң холушкак хевирлериниң талазы-биле маргылдааны эрттирген.
Ийи хүн үргүлчүлээн маргылдаага Ак-Довурактың спорт школазындан Оттук Сегбелдей, Айслан Хертек, Мерген Монгуш, «Idea jj» спорт клувундан Найыр Сандакпан, Начын Ооржак, Элегестен Кара Тыртык-Кара, Кызылдан Херел Салчак олар деңзи аайы-биле чемпионнар болганын ТР-ниң ММА федерациязының кежигүнү, шииткекчи Олча Монгуш медеглээн.
Тиилелгелиг черлер алган спортчулар, Барнаул хоорайга эртер түңнел турнирге, Сибирь федералдыг округка Тываның адын камгалаарын ММА федерациязы дыңнаткан. Спортчу хемчег «Сүбедей» спорт школазының баазазында эң улуг залынга болуп эрткен.
Бистиң республика «Тренер» төлевилели-биле улуг тиилелгелерже бурунгаар базымнарны кылып, Тывада ук спорттуң «аныяк» хевирин сайзырадып турар.
Спортчу маргылдааның эрттирикчилери амыдыралдың кадык овур-хевирин суртаалдаан идепкейжилерге четтиргенин илередип, тренер башкыларның кижизиттирикчилери турнир бедик деңнелге эрткенин демдеглеп, база катап эрттирерин дилээнин дыңнаткан.
