Бай-Тайга кожууннуң Өг-бүлеге болгаш уругларга социал дуза чедирер төвүнүң ажылдакчылары огородчуларга 15 мастер-классты эрттирген. Март айда помидор база перец үрезиннерин олуртуп доостурган. Шак ынчалдыр социал дузаламчы алган өг-бүлелер огород тарыыр арга-дуржулганы шиңгээдип ап турар.
Социал төптүң директору Чодураа Сегбе огород ажылынче улуг кичээнгейни угландырып турарын демдеглээн.
– Эрте чазын-на огород ажылы хайнып үнер. Чаш үнүштерни тарааш, үрезиннерниң өзүмнери көстүп келирге, чылыткыга тарып өстүрери, огородка олуртуру, ажаап-тежээри дээш ажыл-ла эңдерик.
Суму бүрүзүнде хөй ажы-төлдүг болгаш эвээш орулгалыг өг-бүлелерниң өрегелеринге социал ажылдакчылар чедип, үрезин тарылгазындан эгелээш, дүжүт ажаалдазынга чедир арга-сүмезин кадып турар. Социал дуза алыкчыларының барык шуптузу картофель, борщ кылыр ногааларны тарып алыр. Огурец, помидор, перец, свекла, морковь дээш өске-даа ногаа аъш-чемге немере болур болгай.
Бай-Тайганың огородчулары социал четкилерде бөлүүнде арга-дуржулгазын солчуп турар. Оларның чараш чечектериниң чуруктарын көргеш, сонуургал чок улус безин чечектер таарып эгелээн. Чамдык огородчулар ногааларның сорттарын эки билбес тургаш, ам ону дыка сайгарар апарган – деп, директор чугаалап турар.
Бай-Тайга кожуунда огород ажыл-агыйын чорудуп турар өрегелерниң саны чылдан чылче немежип турар. Социал ажылдакчылар оларда чеже картофель үрезини артканын хынап, даңзызын тургускан.
Бо чылын кожуундан «Улусчу картофель» төлевилелге 3231 өг-бүле киржир. Тээлиде 1332 өг-бүле бар. Эрткен чылын эвээш дүжүт алганындан үрезини чедишпейн барган өг-бүлелерниң дыңзызын тургускаш, курлавырда «ийиги хлебтиң» үрезинин үлээрин Чодураа Сегбе немеди.
“Социал картофель” губернатор тө¬левилелди “Улусчу картофель” деп эде адаан. Бо төлевилелдиң чүгле адын өс¬кертир эвес, а ооң киржикчилериниң санын көвүдедир, картофель тарып өстүрериниң хемчээлин барык 16 катап улгаттырар сорулга салдынган.
Тыва Республиканың Чазааның хөй ажы-төлдүг болгаш эвээш орулгалыг өг-бүлелерни деткээн кризиске удур хемчеглериниң бирээзинге “Улусчу картофель” төлевилел хамааржыр.
Бай-Тайга кожуунда алды чылдың дургузунда «Инек – чемгерикчи малым» төлевилел-биле хөй ажы-төлдүг болгаш орулгазы эвээш 119 өг-бүле хунажыннарны алган. Оларның малының баш саны элээн өскен. Төлевилелдиң киржикчилери саан үезинде сүдүн болбаазырадып алгаш, көдээ ажыл-агый ярмаркаларында садып-сайгарып ап турар. Ол дээрге, өг-бүлелерге немелде орулга. Оон аңгыда өг-бүле кезээде сүттүг, өремелиг, саржаглыг, быштактыг, тарактыг болур.
Социал төптүң ажылдакчылары сүттен чем кылыр мастер-класстарны база доктаамал эрттирип турар.
Чуруктарны Шончалай Ховалыг тырттырган
#Бай_тайгакожуун #Өг_бүлегеболгашуругларгасоциалдузачедирертөп #ТМГМедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews
