Ниити-российжи Улусчу фронтунуң «Улусчу полктар» кылдыр каттыштырган республиканың бүгү девискээринде эки турачылары тускай шериг операциязында киржип турар дайынчыларга эргежок херек чажыртынып шыптынар четкилерни кылып турар.
Каа-Хем кожууннуң идепкейжилери эки турачы ажыл-чорудулганың доктаамал киржикчилери дээрзин чагырга чери дыңнаткан. Бо удаада олар чажыртынып шыптынар четкилерни кылгаш, Улусчу фронтунуң регионда салбырынга дамчытканын чагырга чериниң даргазы Евгений Ооржак дыңнаткан.
«Улусчу полктуң» эки турачылары кожууннарны эргий кезип, четкилер кылыр мастер-класстарны чайын эрттирип эгелээн. Олар четкиге кандыг материал тааржырын тыйылбырлап, ооң кылырының техниказын көргүскен. «Улусчу полктуң» Тывада координатору Александра Саая-Шагированың дыңнатканы-биле, эки турачылар чаа партияның четкилерин кылып кирипкеннер. Чүге дизе дайынчылардан чагыглар хөй кээп турар.
“Чажыртынар” четкилер-биле дайынчыларның чурттап турар черин, машина-техниказын, шериг объектилерин шып алырга, эскертинмес болуп, камгалаарынга улуг дузалыг.
