Чөөн-Хемчик кожууннуң төвү Чадаана хоорайга республика чергелиг IV дугаар “Уран дарган” деп дарганнар мөөрейи болуп эрткенин Тыва үндезин культура төвү дыңнаткан.
Дарганнар кыска үениң (2, 3 шак) дургузунда аъттың эзеңгизин шуткуп кылырынга мөөрейлешкеннер. Мөөрейниң тиилекчилерин илередирде жюри кежигүннери эзеңгилерниң албан ийи болурун, оларның деңзилери дең база хевирлери дөмей болурунче кол кичээнгейни салып турганнар.
Кылган ажылдар аразында дугурар база дуңзаалаар үндезин аргаларны ажыглап киирген болза, киржикчиниң тиилелгеже базымы улуг болур дээрзин шииткекчилер барымдаалаан. Эң кол чүүл амгы үениң каңнаашкын, өрүмнээр дээш оон-даа өске аргаларны ажыглавазы болур.
Бирги черге Чөөн-Хемчиктен Александр Сат, ийиги-үшкү черлерге Сүт-Хөл Бадый Ондар, Мерген Куулар төлептиг болган.
Оон аңгыда, Сүт-Хөл кожууннуң дарганнары Виктор Ондар "Дагдыныкчы дарган" база Мерген Сарыглар "Шевергин ажыл" деп тускай шаңналдарга төлептиг болганнар.
"Дарганның уран шенелдези" деп шаңналды Отчугаш Араптан, "Тускай арга" деп шаңналды Сыдым-оол Хертек (Бай-Тайга кожуун) чаалап алганнар. "Мөөрейниң идегели" деп шаңналга Чаа-Хөл кожууннуң дарганы Сылдыс Хайдып төлептиг болган.
