Тере-Хөл кожууннуң төвү Кунгуртугда 60 олуттуг уруглар садының тудуун Бай-Тайга кожуундан хууда сайгарлыкчы Оюнмаа Чедер-оол чорудуп турар.
Тудуг участогунуң начальниги Хаак-оол Баазанның чугаалап турары-биле алырга, ажылдарның 65 хуузу күүсеттинген. Тудуг ажылдарынче 28 кижини хаара туткан.
– Бо хүнде уруглар садының тудуу-биле чергелештир ооң девискээрин чаагайжыдып, котельная, оттулар ыяш шыгжаар чер, септик, херимнерни тургузуп турар. Бок төгер үш контейнерни база эккеп салган.
Нарын айтырыг – тудуг материалдарын чедирип алыры. Май 28-тен тура ажылдап эгеледивис. Ук объектини декабрь 31-ге чедир кылып доозар ужурлуг бис – деп, тудугжу дыңнаткан.
Уруглар садының девискээринде дөрт чаглак шывыглыг шөлчүгешти бөлүк бүрүзүнге тургузар. Тывада чаа төлевилел-биле бир дугаар мындыг хевирниң уруглар садын тудуп турары бо.
Чаагайжыды туттунган уруглар садын ажыглалче хуусаа бетинде ажыглалче киирер дээш, тудугжулар дыштаныр хүн чокка ажылдап турар.
Чылыглап каан сес метр алдан сантиметр узун тудуг панельдерин сөөртүр улуг чүък машиназын арай деп тып алдывыс. Ортумаа-биле он хире рейсти кылыр.
