Эрткен дыштаныр хонуктарда Тываның күрүнениң ойнаар кыстар театрынга Башкириядан келген салым-чаянныг артистер чаштарга солун шиилерни эрттиргенин ТР-ниң Культура яамызы дыңнадып турар.
Башкир тоолдан уктап тургускан «Өскүс дилги» деп көргүзүг уругларга өөредиглиг болган. Артистерниң ойнаар кыстар-биле ойнаарын улуг кижи безин магадап ханмас. Адыг, дилги, бөрү, койгуннуң үннерин безин чаңгыс дөмей өттүнүп, чаштарның бүгү кичээнгейин тоол делегейинче хаара тудупканы кайгамчык болган.
Тоолдуң кол маадыры дилгиниң кажар, мегечи аажызын чаштар эскерип, өске буруу чок маадырларга болчуп турары оларның арын-шырайындан, сеткил-сагыш хайныышкынындан илдең.
Ийи дугаар шии – уругларга билдингир «Айболит эмчиниӊ болгаш ооң өөрүнүң ужуралдары». Айболит эмчи делегейде бар-ла дириг амытаннарга дузалап, оларны эмнеп турары чаштарга энерел сеткилди оттуруп, эки талаже сундугарынга өөредиглиг болган.
«Аныяктарга болгаш уругларга улуг гастрольдар» деп федералдыг төлевилелдиң ачызында Башкирияныӊ күрүнениӊ ойнаар-кыстар театрынга Тывага аалдап келир арга тургустунган.
