Тывада уругларның бүзүрел телефонунче 2025 чылдың тос айларында 6885 дыңнадыг киргенин ТР-ниң Күш-ажыл болгаш социал политика яамызы дыңнаткан.
Бүгү-россияның бүзүрел телефону уругларга болгаш оларның ада-иелеринге дүрген психологтуг деткимчени көргүзүп турар. Бүзүрел телефонунуң чаңгыс аайлаан дугаары 8 (800) 200-01-22 болза, 2024 чылдың декабрьдан эгелеп мобильдиг телефондан 124 кыска дугаарже долгап болур апарган.
Уруглар, элээдилер, оларның ада-иелери болгаш өске-даа хамаатылар тайылбырлыг дуза дилеп долгап болурун яамы дыңнаткан. Ындыг болзажок бо дугаарже долгаан кижилерниң хөй кезии — уруглар болгаш элээдилер болуп артпышаан. Чыл эгезинден бээр олардан 4365 дыңнадыг кирген. Ада-ие болгаш оларны солаан кижилер 1669 катап, а өске хамаатылар 851 катап долгаан.
Уругларның бүзүрел телефонунче кирген долгаашкыннарның хөй кезии уругларның эш-өөрү-биле харылзаазынга хамаарышкан айтырыглар – 1014 таварылга. Ада-ие биле ажы-төлдүң аразында хамаарылгада бергедээшкиннер дээш 995 катап долгаан.
Өөредилгезинде бергедээшкиннер болгаш мергежил айтырыгларынга хамаарышкан 780 дыңнадыг кирген. Уругну доктаамал түр бастыр темага 73 долгаашкын бар. Өг-бүледе уругларга каржы хажагай чорук демдеглеттинген 40 таварылга бүрүткеттинген.
Оон аңгыда, бодун кижи кылдыр хүлээп алырынга, эр-кыс харылзааларга, уругларның болгаш элээдилерниң кадыкшылынга, аңгы-аңгы сагыш-сеткил хөлзээшкиннеринге, социал адаптация айтырыгларынга болгаш уругларның эргелерин камгалаары негеттинип турар байдалдарга хамааржыр айтырыглар хөйү-биле кээп турар.
Уругларның бүзүрел телефону албан черинде дээди эртемниг, бедик мергежилдиг психологтар ажылдап турар. Оларның кол сорулгазы – психологтуг сагыш-сеткил дүвүрелин эвээжедири болгаш долгап турар кижилерни айыылдан камгалаары.
Консультация берикчилери долгап турар улустуң берге байдалдарын сайгарып, ооң чылдагааннарын тодарадып, эң-не таарымчалыг шиитпирлерни тыварынга дузалаар.
Уругларның бүзүрел телефону дамчыштыр психологтар-биле харылзажыры чажыт.
Бүрүзел телефону уругларга, оларның ада-иелеринге болгаш уругнуң айыыл чок чоруунга сонуургалдыг кижи бүрүзүнге үезинде профессионал дузаны чедирер дээш 24 шак дургузунда ажылдап турар.
Күш-ажыл яамызының дыңнатканы-биле алырга, отчеттуг үениң дургузунда телефон таварыштыр консультациядан аңгыда, өске-даа таварылгаларда ачы-дузаны көргүзүп турар.
