Таңды кожууннуң Успенка сумузунда «Сорунза» төлевилели-биле туттунган көдээ культура бажыңын ажыглалче киирген.
Кожууннуң чагырга чериниң даргазы Алик Монгуш ук төлевилелче өскерилгелерни киирип, чурттакчы чонга эптиг байдалдарны тургузар дээш культура одаанга немей ном саңын тудуп, чаа базымны кылганын дыңнаткан.
Тываның культура сайыды Виктор Чигжит, кожууннуң чагырыкчызы, Успенка сумузунуң хүндүлүг хамаатызы Маадыр-оол Ооржак кызыл кожааны кезип, чыылган чонга байырын чедирген. Тудуг ажылдарынга үлүг-хуузун кииргеннерни демдеглеп, шаңналдарны тывыскан.
Эрткен чылга деңнээрге, бо чылын «Сорунза» төлевилелиниң киржикчи кожууннары даалгазын чедиишкинниг күүсеткен деп, Тываның Чазааның төлевилел ажыл-чорудулгазының эргелели демдеглээн. Эрткен чылын чеди суур төлевилелге киржир күзелин илереткен, ындыг болзажок чүгле чаңгызы айыттынган хуусаазында ажылдарны дооскан болза, артканнары элээн озалдааннар.
2023 чылда ук төлевилел уламчылаар. Тываның культура яамызы киржикчилерни шилип, илередир.
