Виктор Пюрюна «Ада-чурт мурнунга ачы-хавыяазы дээш» орденниң II чергезиниң медалын алган

Президент Владимир Путинниң айтыышкыны-биле эрттирген «Биче төрээн чурт – Россияның күжү» III бүгү-российжи муниципалдыг шуулган Тус чер бот-башкарылга хүнүнүң бүдүүзүнде, Москвада Национал төпке ажыттынган.

Күрүне шаңналдары тыпсыр езулал үезинде, Владимир Путинниң өмүнээзинден Президент Администрациязының удуртукчузунуң бирги оралакчызы Сергей Кириенко байырны чедирип, чурттуң 30 субъектизиниң төлээлеринге 39 шаңналды тывыскан. Оларның аразында муниципалитеттерниң сес төлээзи «Ада-чурт мурнунга ачы-хавыяазы дээш» орденниң II чергезиниң медальдарын алган.

Тыва Республиканың төлээзи Шагаан-Арыг баштыңының оралакчызы – Төлээлекчилер хуралының даргазының Виктор Пюрюна база оларның санынче кирген.

Виктор Кууларович – Улуг-Хем кожууннуң хөгжүлдезинге улуг үлүг-хуузун киирген муниципалдыг албанның хоочуну. Улуг-Хем кожууннуң чагырга даргазынга ийи катап (1998, 2003 чылдарда) соңгуткан. Ооң удуртулгазы-биле чугула социал объектилер: Иштии-Хем, Ийи-Тал суурларда клубтар, Арыг-Бажы, Иштии-Хем, Арыг-Үзүү суурларда школалар туттунган.

В.К. Пюрюна Шаагаан-Арыгда амыдыралдың шынарын бедидеринче угланган төлевилелдерни: хөй квартиралыг бажыңнар болгаш 400 олуттуг гимназия тудуун боттандырган.

Төлээлекчилер хуралының даргазының оралакчызынга ажылдап тургаш, кем-херек үүлгедиишкиннерин болдурбас база чурттакчы чоннуң айыыл чок чоруун хандырарынче кол кичээнгейни угландырган. Берге элээдилер-биле ажылы дээш Улуг-Хем кожуун чагыргазының өөрүп четтириишкин бижиин алган. Виктор Кууларович ада-чуртчу хемчеглерниң эки турачызы база организатору, хөй-ниити ажылдарының киржикчизи, 2022 чылдан бээр тускай шериг операциязының киржикчилерин идепкейлиг деткип чоруур эки турачы.

Тус чер бот-башкарылга институдунуң ролюн болгаш ужур-дузазын быжыглап, демократияны болгаш хамааты ниитилелди хөгжүдер дээш, 2012 чылда Президент Владимир Путинниң чарлыы-биле Тус чер бот-башкарылгазының хүнүн тургускан.