Виктория Абрамченко: Тывага агроүлетпүр комплекизин дүрген хөгжүдери чугула

Россияның Чазак даргазының оралакчызы Виктория Абрамченко Тываның Баштыңы Владислав Ховалыгның ажылынга моон-даа соңгаар чедиишкиннерни күзээн.

Виктория Абрамченко Тываның Баштыңының албан-дужаалга бир чыл болганы-биле байыр чедирген телеграммазында чедиишкиннерни чедип алырда кол рольду ойнаан шиитпирлиг болгаш ажыл-ишчи шынарларын онзалап демдеглээн.

Россияның Чазак даргазының көдээ ажыл-агый айтырыгларын удуртуп турар оралакчызы Виктория Абрамченко кызыгаар регион Тывага агроүлетпүр комплекизин дүрген хөгжүдери чугула дээрзин онзалап айыткан. Амгы экономиктиг байдалдар үезинде ол айтырыг чугула черни ээлеп турар.

– Амгы инвестиция төлевилелдерин деткип, көдээ ажыл-агый ажыглалынче чаа черлерни киирип, боттуң бүдүрүлгезиниң темпизин улгаттырар херек. Чүгле төлевилелдер боттаныышкынының стратегиязын хүлээр эвес, үре-түңнелдерни база көргүзер. Регионга херек шупту деткимчени көргүзер мен. Чаңгыс чылдың ажылы – оруктуң чүгле эгези, хөй эвес үе-дир. Тываның, Сибирьниң база Россияның хөгжүлдези дээш ам-даа үре-түңнелдиг ажылдаарыңарны күзедим! – деп, телеграммада бижээн.