Тываның Баштыңы Владислав Ховалыг Москвага сургакчылап чорааш, Россияның Камгалал яамызының А.А. Вишневский аттыг төп клиниктиг госпиталында бедик шынарлыг эмчи дузазын ап чыдар бистиң чаңгцс чер чурттугларывыска ужуражып чораан. Владислав Ховалыг Россияның Чазаанга Тываның социал-экономиктиг хөгжүлдезиниң айтырыглары-биле албан ужуражылгаларының аразында чаңгыс чер чурттугларывыска чедер үени кезээде тып турарын дыңнаткан.
– Мен үргүлчү маңаа келирин кызыдар мен. Улуг болгаш биче төрээн чуртунуң салым-чолу дээш сагыш човап чоруур эрес-дидим дайынчыларга албан ужуражыр-дыр мен. Дайынчыларның кадыкшылын катап тургузар дээш бүгү-ле чүүлдерни кылып чоруур эрес-дидим эмчилеривиске улуу-биле өөрүп четтирдивис – деп, Тываның Баштыңы бодунуң блогунда демдеглээш, бистиң республиканың Москвада бүрүн эргелиг төлээзи чаңгыс чер чурттуглар-биле сырый харылзааны тургузуп, чүгле найысылалда эвес, а Москва облазында болгаш Санкт-Петербургта кол эмнелгелер-биле сырый харылзажып, эмнедип чыдар дайынчы оолдарга барып, бажыңга кылган аъш-чемни эккеп, байырлалдар-биле байыр чедирип, төрелдери-биле ужуражылгаларны организастап турар.
2024 чылда бүрүн эргелиг төлээниң ажылдакчылары Москвада болгаш Москва облазында 23 эмнелге албан черинге эмнедип турган Тывадан 170 шериг албан-хүлээлгелигни, а Санкт-Петербургтуң 11 эмнелге албан черинде 38 шериг албан-хүлээлгелигни хайгаарап көрген. 2023 чылдың декабрьдан 2024 чылдың төнчүзүнге чедир тускай шериг операциязының 122 киржикчизин болгаш оларның 140 төрелдерин найысылалга турар үезинде, Бүрүн эргелг төлээ чериниң хостелинге түр када халас чурттаткан.
Тываның Баштыңы Владислав Ховалыгның даалгазы-биле Москвада Тыва Республиканың бүрүн эргелиг төлээ чери Тывадан тускай шериг операциязының киржикчилеринге болгаш оларның өг-бүлелеринге төлевир айтырыгларынга консультацияларны, читкен оолдарны дилээринге дузаны, шериглерни болгаш оларның төрелдерин шериг социал төвүнче үдээрин, балыгланган оолдарны халаарын, ол ышкаш өске-даа чугула даалгаларны шиитпирлээринге улуг деткимчени көргүзүп турар.
Бүрүн эргелиг төлээ чери кемдээшкин алган шериг албанныгларның даңзызын доктаамал чаартып, оларның эмнээшкинин хайгаарап, Россияның Камгалал яамызының Кол эмчи эргелели, Шериг-социал төвү база “Ада-чурт камгалакчылары” фондузу-биле харылзааны тудуп турар.
Оон аңгыда Москвада Тыва Республиканың бүрүн эргелиг төлээ чериниң ажылдакчылары Санкт-Петербург хоорайның шериг госпитальдарында чаңгыс чер чурттугларывыска посылкаларны чедирген, а бүрүн эргелиг төлээниң чолаачылары тускай шериг округунуң дайынчы девискээрлеринге ачы-дузаны чедирген.
