Владислав Ховалыг: «Чон болгаш ниитилел күткүүшкүннерге алыспайн, мерген угаанын көргүзер ужурлуг»

Тываның Чазаанга аппарат хуралы эрткен каш хонуктарда Тываның соцчеткилеринде база мессенджерлеринге чидии-биле көдүрүлген найысылалда мигрантыларга удур темага хамаарыштыр корум-чурум камгалаар органнарның илеткелинден эгелээн.

Тываның Баштыңы Владислав Ховалыг эрге-хоойлу камгалакчыларындан оттурган кеземче херектерин, аңаа буруудаттырган кижилерни база оларга хамаарыштыр алдынган хемчеглерни чонга дарый дыңнадырын дилээн. «Истелге чажыт болуру шын. Ынчалза-даа шынныг медээниң чедишпези чугаа-сооттарны үндүрүп, ону тараткан. Чижээ, административтиг кеземчеге онаажыр хамаатылар база бар» – деп, ол бодунуң блогунда тайылбырлаан.

Владислав Ховалыг республика болгаш федералдыг структураларның удуртукчуларынга, ол ышкаш муниципалдыг эрге-чагырга органнарының төлээлеринге негелде соонда, тургустунган байдалга хамаарыштыр бодунуң туружун тодаргай айыткан. Чуртче дыштанып азы ажылдап кээп турар даштыкылар Россияның хоойлуларын сагып, ооң бүгү чоннарының культуразын болгаш чаңчылдарын хүндүлеп, национал диаспоралар чаңгыс чер-чурттугларының ортузунга идепкейлиг кижизидилге болгаш профилактика ажылын чорудар ужурлуг дээрзин онзалап демдеглээн.

«Кандыг-даа чон бодунуң аңгы-аңгы төлээлериниң кем-херек үүлгедиишкиннери дээш кеземче албас ужурлуг» - деп, Тываның Баштыңы демдеглээш, кем-херек үүлгедиишкини язы-сөөгүнден хамаарышпазын онзалап демдеглээн. Ол ышкаш эрге-хоойлу камгалаар органнарның ажыл-чорудулгазын солуп, кым-даа туразында яла кылыр эргези чок, ол дээрге кем-херек үүлгедиишкини апаар деп чугаалаан.

Владислав Ховалыг ниитилелди дүвүредирин оралдашкан күткүкчүлерге таарымчалыг чер – чоннар болгаш шажыннар аразында хамаарылгалар деп ол онзалап айыткан.

«Тускай шериг операциязы чоруп турар берге үеде, ниитилелди божаңнадыр оралдажыышкыннарны көрүп турар бис. Корум-чурум камгалаар органнар кандыг-даа ындыг күткүүшкүннерни шыңгыызы-биле соксадыр ужурлуг» – деп, Тываның Баштыңы демдеглээн.

Оон аңгыда, Владислав Ховалыг язы-сөөк ылгаар чылдагааннар-биле байдалды чидиглендирерин болдурбайн, ам күткүүшкүнге алыспайн, кажангызындан-даа артык мерген угаанныг болгаш туттунуп билир чорукту көргүзер ужурлуг деп чугаалаан. Хөй-ниити организацияларының, национал диаспораларның, хамааты идепкейжилерниң, эрге-чагырга органнарының болгаш медээ четкилериниң киржилгези-биле ажык чугаа социал чөрүлдээлерни болдурбазынга үндезин болур ужурлуг дээрзинге республика баштыңы бүзүреп турар.

Бөгүн, декабрь 17-де, Владислав Ховалыгның удуртулгазы-биле республика Чазаанга Чоннар болгаш шажыннар аразының харылзааларының талазы-биле чөвүлелдиң улуг хуралы болуп эртер.