Санкт-Петербургтуң делегей чергелиг экономиктиг шуулганының үезинде, Тываның Баштыңы Владислав Ховалыг Непал Республиканың элчини Джанга Бахадур Чаухан-биле ужуражылганы эрттирген. Ийи регионнуң аразында кады ажылдажылганың келир үезин талалар чугаалашкан. Олар шажын, эртем болгаш туризм адырында удур-дедир эштежилгеге ажыктыг айтырыгларны сайгарган. Ийи чуртту каттыштырып турар сарыг шажынның байлак чаңчылдарынче онза кичээнгейни угландырган.
Владислав Ховалыг Джанга Бахадур Чауханга непалчыларның Республика хүнү-биле байырын чедиргеш, Тываның, бистиң регионнуң ужур-чаңчылдарының болгаш культуразының дугайында таныштырган. Тываның Баштыңы чугаа аразында Чауханны 2026 чылда Тывага болуп эртер делегей чергелиг IV буддийжи шуулганның киржикчизи кылдыр аалдап келиринче чалаан.
Росконгресстиң база Күжүгет Шойгу аттыг культура фондузунуң эгелэшкини база буддийжи өөредилге болгаш эртем-шинчилелдер деткиир фондузунуң деткимчези-биле Россияның будиийжи регионнарында эртип турар бо шуулган делегейде аңгы-аңгы буддийжи ниитилелдер удуртукчуларының, эртемденнерниң болгаш культура ажылдакчыларының аразында идепкейлиг харылзааның шөлү апаар.
«Дээрги элчинни шуулганның хүндүлүг аалчызы болурунче чалаан мен. Ол ышкаш Непал Республикадан шажын чүдүлге, эртем ниитилелиниң болгаш туризм адырының төлээлеринден тургустунган делегацияны база көөр боор бис. Бис аңгы-аңгы чурттарның буддийжи ниитилелдериниң аразында харылзааларны быжыглаар арга-дуржулга солчулгазының, амгы айтырыгларны сайгарарының онзагай шөлүн организастаарын кызыдар бис» » - деп, Тываның Баштыңы ужуражылга соонда чугаалаан.
Дээрги Чаухан чалалганы чылыг-чымчак хүлээп алгаш, болур хемчегниң ийи талага чугулазын демдеглээн. Чоннарның сүлде-сүзүүнүң болгаш езу-чаңчылдарының чоогун онзалап демдеглеп, ол шуулганда киржир Непалдың шажын ажылдакчыларының болгаш тускай мергежилдиглерниң делегациязын деткииринге беленин дыңнаткан.
Ужуражылга үезинде турисчи маршруттарны сайзырадыр, ийи күрүнелерниң онзагай культурлуг үнелиг чүүлдерин нептередир, өөредилге харылзааларын тургузарының талазы-биле кады ажылдаар планнарны тургускан. Ужуражылга соонда, культура-гуманитарлыг кады ажылдажылга, экономиктиг харылзаалар болгаш сүлде-сүзүк өнчүзүнүң ниити үндезиннерин ханы билип алырының айтырыгларынга идепкейлиг харылзааны уламчылаар дугайында шиитпирни хүлээп алган.
Россия биле Непалдың аразында дипломаттыг харылзаалар 1956 чылда тургустунган. Бо хүнде ийи чурттуң аразында даштыкы политика албан черлериниң болгаш парламент баштыңнарының деңнелинде доктаамал харылзаа тургустунган.
Эрге-хоойлу, экономиктиг болгаш культурлуг адырларда сырый кады ажылдажылга чоруп турар. Садыг-саарылганың дараазында кол угланыышкыннары нептереңгей – Россияның транспорту, аъш-чем аймаа болгаш көдээ ажыл-агый продукциязы, ол ышкаш Непалдың хевистери болгаш шай импорту.
Россияның дээди өөредилге черлеринде тускай мергежилдиглерни белеткеп, өөредилге, эртем, техниктиг кады ажылдажылга идепкейлиг хөгжээн. Чоннар аразында найыралды, бот-боттарының билчиишкинин быжыглаан культурлуг хемчеглер эрттирип турар.
