Тываның Баштыңы Владислав Ховалыг Федералдыг арга-арыг агентилелиниң удуртукчузу Иван Советников-биле ужуражып тура, Сибирьде, ылаңгыя Тывада арга-арыг өрттеринге удур бөлүктерниң кадрлар тургузуун эде көөрүн Росарга-арыг ажыл-агыйының удуртулгазынга саналдаан. Агаар-десант бөлүктерниң санын көвүдедири чугула. Өрттерниң хөй кезии чедип алыры берге черлерде, аңаа өрт өжүрүкчүлерин чүгле агаардан чедирип болурун 2024 чылдың арга-дуржулгазы көргүскен.
– Иван Васильевич Советников-биле өрт сезонунуң түңнелдерин база Тываның арга-арыг адырында ниити байдалды чугаалаштывыс. Республиканың бүгү девискээриниң 82 хуузун ээлээн дагларда өрттерден эң улуг чидириглер болуп турар. 2024 чылда чер-биле чедери болдунмас шак ындыг черлерге кургаг чаңныктар соонда дыка хөй арга-арыглар өрттенген – деп, Тываның Баштыңы Росарга-арыг ажыл-агыйының удуртукчузунга чугаалаан.
Тывада арга-арыг өрттери-биле демисежир дээш кожа-хелбээ регионнарның күжүн дүрген чыып алган Росарга-арыг ажыл-агыйының дузазы-биле оон-даа улуг чидириглерни болдурбаанын Владислав Ховалыг демдеглээн. Арга-арыг өрт албан черлерин дроннар-биле чепсеглеп алганы база улуг дуза болган – олар өрттерни эртежик илередип, дүрген өжүрер арганы берген.
Росарга-арыг ажыл-агыйының удуртукчузу-биле ужуражылга үезинде, Тываның арга-арыг өрт албанынга немелде акшаландырыышкынның айтырыын база чугаалашкан. Ооң түңнелдеринге даянып, республиканың Арга-арыг яамызынга парашют албанының ажылдакчыларының санын көвүдедири чугула деп үндезинни белеткээрин дааскан.
– Бо өрт сезону регионнар-биле кады ажылдаары арга-арыг өрттери-биле демиселге кол черни ээлеп турарын көргүскен. Камгалалдыг девискээрлерни 2,5 сая гектарга көвүдээни немелде арга-херекселдерни болгаш күжениишкиннерни негеп келген. Республикада арга-арыг өрттерин дүрген өжүреринге эргежок чугула авиация бөлүктерин чепсеглеп, агаардан хайгааралдың санын көвүдедиринге немелде акша-хөреңгини үндүрерин идепкейлиг сайгарып турар бис – деп, Иван Советников онзалап демдеглээн.
Тывага 2024 чыл – сөөлгү сес чылда арга-арыг өрттериниң талазы-биле эң берге чыл болган дээрзин сагындыраал. Бүдүн сезон дургузунда республиканың девискээринге ниитизи-биле 44,8 муң гектар шөлге 207 арга-арыг өрттери бүрүткеттинген, эрткен чылын болган өрттерден 12 катап хөй. Өрттерниң ырак черде болгаш ынаар транспорт-биле чедирери берге болганындан ол аар уржуктарлыг болган.
Ужуражылга үезинде Тываның шупту 10 арга-арыг ажыл-агыйларның кызыгаарларын тургузуп, оларның дугайында медээни Чаңгыс аай күрүне даңзызынче кииргенин демдеглээн. Арга-арыгны турзурар ажылды база чугаалашкан. Ынчап кээрге, 2025 чылда арга-арыгның үнелелин тургузуп, бүрүткел ажылдарын чорудуп, ол ышкаш 250 муң гектар шөлде арга-арыг камгалалының хемчеглерин планнаан. Ажыглалдыг, камгалалдыг, курлавырлыг арга-арыгларның, ол ышкаш 250 муң гектар шөлде онза камгалалдыг арга-арыг девискээрлериниң база 4 сая гектар шөлде арга-арыг девискээрлериниң төлевилелин база чорудар.
В Туве с начала пожароопасного сезона зарегистрировано восемь лесных пожаров
Глава Тувы Владислав Ховалыг сообщил в своем блоге о том, что в республике с начала пожароопасного сезона зарегистрировано уже 8 лесных пожаров на общей площади около 300 гектаров и 11 возгораний в с…