Тываның Баштыңы Владислав Ховалыгның даалгазы езугаар, Тываның Чазаа социал четкилерде болгаш мессенджерлерде регионалдыг бөлүктерде тараан видеобижидилгелерде республикадан шериг албан-хүлээлгелиглерниң киржилгези-биле болган болуушкуннуң истелгезин хыналдага алган.
2025 чылдың январь 16-да 55115 шериг кезээнге, тускай шериг операциязының девискээринче чорудар мурнунда керээлиг шериг албан-хүлээлгелиглерни электрилиг шокер ажыглап, каржызы-биле эттеп турар болуушкунну көргүзүп, дыңнаткан.
Республиканың удуртулгазы ол болуушкунну ол дораан онза хыналдада алган. Тываның Баштыңының тускай шериг операциязының айтырыгларның талазы-биле тускай төлээзи Тимур Кууларның дыңнадып турары болза, бо болуушкунга хамаарыштыр шериг-истелге комитединиң истелге-оперативтиг бөлүү болгаш шериг прокуратуразы ажылдап турар.
Буруулуг кижилерни тодараткан, оларга онааштыр баш бурунгаар истелге хыналдазын эгелээн, ооң түңнели-биле РФ-тиң Кеземче-процессуалдыг хоойлузу езугаар болган болуушкунга үненелди берип, буруулуг кижилерге кеземчени онаар.
Тимур Куулар оон аңгыда 55115 бригаданың дөрткү батальонунуң шериглериниң командылал чериниң шиитпири-биле оларны эде хуваар дээн видеодыңнадыын тайылбырлаан. Бо дыңнадыгда байдалды бүгү талазы-биле өөренип көрүп, шиитпирни үндүрер кылдыр, 41 дугаар армияның командылал черинче, Төп шериг округунуң политиктиг ажыг талазы-биле оралакчызының дузалакчызынче, ол ышкаш Россия Федерациязының Төп шериг-политиктиг эргелелиниң удуртулгазынче дамчытканын дыңнаткан.
Тываның Чазаа оон өске, Владимир облазынга шериг албанын келдирилге езугаар эрттирип турган бир шериг оолдуң авазының ооң оглун эштери кемдедир эттеп каан дугайында видео-дыңнадыгны хыналдада алган. Тыва Республиканың Чазааның даргазының оралакчызы Айдыс Сынаа ол фактыга хамаарыштыр негелдени Владимир гарнизонунуң шериг прокуратуразынче чорутканын дыңнаткан.
