Владислав Ховалыг Тываны хөгжүдериниң кол төлевилелдерин боттандырар айтырыглар талазы-биле ажылдап турар

Тываның Баштыңы Владислав Ховалыг РФ-тиң Чазааның даргазының бирги оралакчызының деткээни Тываны хөгжүдериниң кол төлевилелдерин боттандырар айтырыглар талазы-биле ажылдап турар.

Владислав Ховалыг бо удаада Москвага сургакчылаашкынының үезинде, Россияның Чазааның Даргазының бирги оралакчызы Денис Мантуровтуң республиканың инфратургузуг хөгжүлдезиниң айтырыгларынга хамаарыштыр чогуур федералдыг албан черлеринге даалгалары-биле ажылдап турар. Ылаңгыя Россияның Чазааның 2021 чылдың декабрьда бадылааны Тываның энергетика хандырылгазының комплекстиг планын боттандырарын болгаш республиканың орук четкизин хөгжүдерин чедип алырының талазы-биле.

Бо чылдың октябрьда Тываның Баштыңының болгаш чогуур федералдыг албан черлериниң удуртукчуларының киржилгези-биле эрткен РФ-тиң Чазааның Даргазының бирги оралакчызының ажылчын хуралының үезинде Денис Мантуров федералдыг яамыларга чогуур даалгаларны берген турган. Россия Федерациязының Чазааның Даргазының бирги оралакчызының дорт айтыышкыннары Тываның Баштыңының эгелээни Тыва Республиканы хөгжүдер кол төлевилелдеринге федералдыг деңнелге комплекстиг деткимче болур.

Владислав Ховалыгның болгаш Тываның Чазааның мурнунда бистиң регионнуң социал-экономиктиг болгаш инфратургузуг хөгжүлдезин шапкынчыдар даалгаларның улуг даңзызын боттандырар хөй ажылдар манап турар. Ону федералдыг болгаш регионалдыг деңнелинге, федералдыг албан черлеринге болгаш организацияларга ажылдап кылыр апаар. Бо ажылды Тываның Баштыңы федералдыг төп-биле – видеоконференция хевиринге-даа, ажыл-албан сургакчылаашкыннарының аайы-биле-даа доктаамал чорудуп турар.

Амгы үеде республикада Ак-Сугнуң чес-порфир чыдынында даг-болбаазырадылга ажылдары чорудар келир үениң комбинадынче чырык дамчыдар улуг шугум тудуу чоруп турар. Ак-Сугже чырыкты шөйүп киирери амгы үеде дизельдиг шимчедикчилерлиг Тожу кожууннуң чырык хандырылгазын шиитпирлээр деп, Владислав Ховалыг мооң мурнунда-ла демдеглээн. Кызылдың энергетика күчүзүн улгаттырарын комплекстиг планда кииргени, чуртталга тудуунуң калбарганы ук айтырыгны дарый шиитпирлээрин негеп келген.

Росчерниң эрттирери аукционда тодараттынар Ак-Суг чыдынын болбаазырадыр келир үеде эчис инвестор Тожу кожуунну чырык-биле хандырар ажылды хүлээнир деп, Тываның Баштыңы бодунуң блогунда дыңнаткан. Аукционнуң түңнелдери чыл төнчүзүнге чедир билдине бээр ужурлуг.

«Тываның энергетика хандырылгазының комплекстиг планының (документини Россияның Чазаа бадылаан) бүрүн эргелиг киржикчизи болур инвестор чүгле социал харыысалгалыг эвес, а чес казып тывары кожуунну чырык-биле хандырар ужурлуг. Октябрьда Денис Валентинович Мантуровтуң эрттиргени ажылчын хуралының протоколунда ол даалга демдеглеттинген. Дүүн чаа түңнел шиитпирге атты салган» – деп, Владислав Ховалыг дыңнаткан.

Россияның Чазааның Даргазының бирги оралакчызының даалгазын октябрь хуралының түңнел протоколунда киирген даалгазы – регионнуң орук четкизин нормативтиг байдалче киирер айтырыгны Тываның Баштыңы чугаалажып турар. Тываның Баштыңының дыңнатканы-биле алырга, планнаттынган ажылдарга акша-хөреңгини тускайлаарының, немелде акшаландырыышкын дөстериниң хемчээлин тодарадырының-даа айтырыглары амгы үеде тодаргайлаттынып турар.

Владислав Ховалыг “Енисей” Р-257 федералдыг оруктуң 17 аварийлиг-ондактыг участогунуң эде чаартылгазын, регионнар аразының Ак-Довурак – Абаза оруунуң септелгезин дүрген эгелээр күзелин дыңнаткан. Тываның Баштыңының саналы федералдыг деңнелде бадылаан белен төлевилел апарып, оруктуң ол участокта айыыл чок чоруунуң үр үеде тургустунуп келгени айтырыын шиитпирлээр.

Тываның Баштыңының чогуур яамыларга ажылчын ужуражылгаларының үезинде, Денис Мантуровтуң деткээни Тываның девискээрин таварты Моол болгаш Кыдатче транспорт оруунуң төлевилелдерин боттандырарының айтырыгларын сайгарып көөр. Россияның Чазааның Даргазының бирги оралакчызы албан чери болгаш корпоративтиг деңнелде Моолдуң болгаш Кыдаттың туружун барымдаалап, сонуургалдыг инвесторларның деткимчези-биле демир-орук тудуунга техниктиг-экономиктиг үндезининиң белеткелин дүргедедир даалгаларны берген.

Денис Мантуровтуң даалгазы-биле оон аңгыда, чөөн чүкче углай хөмүр-даш продукциязын магадылалдыг үндүр сөөртүр хемчээлдериниң айтырыын ажылдап кылыр. Владислав Ховалыгның бодалы-биле алырга, Тываның даг-руда компаниязының хөмүр-дажын экспортче садарын улгаттырары чурттакчы чонга ооң садар өртээн тургузар ужурлуг. Денис Мантуров Транспорт яамызынга, Энергетика яамызынга база Россияның демир-оруктары компаниязынга ол айтырыг-биле ажылдап, чөпшээрежилгелиг шиитпирни тыварын дааскан.