Тываның Чазаа биле «Яндекс» компания Санкт-Петербург шуулганының үезинде кады ажылдажылга дугуржулгазынга атты салган. Ол документиге Тываның Баштыңы Владислав Ховалыг биле билдингир компанияның регионалдыг харылзаалар талазы-биле директору Антон Москаленков атты салган.
Тыва 2016 чылдан бээр «Яндекс»-биле кады ажылдап турар. Тываның гуманитарлыг болгаш тускай шинчилелдер институду-биле кады ажылдааш, компанияның сервизинче тыва дылды киирген, ооң иштинде «Поиск» (Дилеп-тывар) биле «Яндекс-Переводчик» (Яндекс-очулдурукчуну). Нейрочеткилерни өөредиринге чүс-чүс муң сөс каттыжыышкыннарын болгаш сөстерни чыыр дээш улуг ажылды чоруткан. Ол дыл амгы үеде республиканың чурттакчыларынга, эртем ажылдакчыларынга, аян-чорукчуларга чедингир апарган.
Владислав Ховалыг чаа дугуржулгага хамаарыштыр бодалын илередип тура, дыл төлевилели ажылын ам-даа уламчылаарын дыңнаткан.
«Ам дараазында эчис сорулгавыг сорулгавыс – тыва дылдың ниити Национал корпузун тургузары. Ол алыс кедизинде «Алиса», «Яндекс Станция» болгаш өске-даа угаан продуктулары тыва дылды билип, тыва дылга чугаалап шыдаар кылдыр үн сервистерин хөгжүдериниң технологтуг үндезини апаар ужурлуг» – деп, Тываның Баштыңы чоокку келир үеде «Яндекс» компаниязы-биле кады боттандырар планнарын ажыткан.
Компания оон аңгыда Тывага чурагай хүрээлеңин оон-даа улам хөгжүдеринге дузалаар. «Яндекстиң» ачызында республиканың күрүне эрге-чагырга органнары күрүне ажылдакчыларының хүн бүрүде ажылынга чугула херек чүүлдер: электроннуг почта, мессенджер, телекөвүрүг, интернет-шыгжамыр, документилер, файлдар солчулгазы, «Алиса Про» кылымал угаан-дузалакчы болгаш өске-даа сервистерниң «Яндекс 360» экосистемазын 2030 чылга чедир халас ажыглаар арганы алган.
Санкт-Петербургка чарган дугуржулга езугаар «Яндекс» школачыларга болгаш ортумак профессионал өөредилге сургуулдарынга программалаашкын дылдарын, машина өөредилгезин, капсырылгалар, нейрочетки чогаадып кылырынга өөредилге курстарын бээр «ЯндексЛицей» төлевилелди Тывага ажылдадып эгелээринге белен. Баштай Тываның найысылалынга шөлчүгешти ажыдар апаар, оон кожууннарга лицейниң турарын нептередири планнаттынар.
Компания өөредилге чорудуун башкарар система – LMS Яндексче кирер аргазын Тываның башкыларынга ажыдарын планнап турар. Тускай мергежилдиглер Тываның Өөредилге хөгжүлдезиниң институдунга регионнуң башкыларынга шөлүн ажыглаарын өөредиринге белен. Ол ышкаш 2030 чылга чедир «Яндекс 360» шөлүнүң кол ачы-дузаларын Тываның бүгү башкылар ниитилежилгезинге халас ажыглаар кылырын база планнап турар.
Медээни болгаш чурукту Тываның Чазааның парлалга албанындан алган
