Сүт-Хөл кожуунга Оваалыг-Тей девискээринге Кызыл-Тайганың ээлчеглиг дагылгазы болуп эрткенин чагырга чери дыңнаткан.
Дагылга езулалынга Тываның Камбы-Лама эргелелиниң хүндүлүг башкылары мөргулдерни номчуп, саңны салган. Дагылганың киржикчилери бүгү тыва чоннуң хей-ады кезээде бедик чоруурун, аарыг-аржык чайлаарын, аас-кежик доктаарын, кезээде амыр-тайбың турарын йөрээп, чалбарган.
Тываның алдарлыг артизи, хөөмейжи Ай-Хаан Ооржак ыдыктыг езулалга киржип, чүдүкчүлерниң хей-адын күүселдези-биле улам-на көдүрген.
Сүт-Хөл кожууннуң чагырга даргазы Орлан Монгуш, Төлээлекчилер хуралының баштыңы Андрей Хертек, Суг-Аксы сумузунуң баштыны Якир Ондар база Камбы-Лама эргелелиниң башкылары чыглып келген улуг-биче чонга хемчегниң кол утказын таныштырып, сүзүктүг байырлалды демниг удуртуп, киришкеннер.
Дагылга соонда эр болгаш кыс чудукчу чон аразынга 50 болгаш 100 метрге назы-хар аайы-биле даг оору-биле чадаг чарыш, 18 хар чедир мөгелер хүрежи болуп эрткен. Тиилекчилерни өртектиг белектер-биле шаңнап-мактаан.
Таңды дагыыры дээрге тыва чоннуң ыдыктыг сүзүглели. Дагылганың киржикчилери ак сүдүн оран-тандызынче чажып, аъш-чеминиң дээжизин өргээн.
