Тываның Баштыңы Владислав Ховалыг частың башкы хүнүнде Ыдыктыг Сака Дава айы эгелээнин социал четкилерге бодунуң арынында медеглээн. Ол тожуларның кайы-хире демниин, сүзүктүүн, хей-аъдының бедиин онзалап демдеглээн.
– Тожунуң чурттакчылары ыдыктыг айда Тоора-Хемде хүрээзин байырлыг байдалга ажытканынга өөрүп тур мен. Буянныг үүле – хүрээ тудуунга кожууннуң чурттакчы бүрүзү үлүг-хуузун киириштирген. Хүрээ тудуунга акша-төгерикти тус черниң чурттакчыларындан аңгыда, республиканың энерел сеткилдиг хамаатылары база өргээн – деп, Чазак Даргазы бижээн.
Тываның IV Камбы-Ламазы Гелек Нацык-Доржу Башкы тожуларга байырын чедирген. Эрткен чылын Тываның Камбы-Ламазы хүрээ тудар черни айтып, бумба салыр езулалга киржип, айызын берген турган.
Чоннуң деткимчези-биле Тоора-Хемде хүрээниң тудуу эрткен чылын июнь 1-де эгелээн. Нарын деңнелдиг тургузуглуг үш каът оран-саваны улусчу тудуг аргазы-биле туткан. Тудуг ажылында кожууннуң аңгы-аңгы сумуларының тудугжулары, идепкейжи чону киржип, болур-чогуур деткимчезин көргүскен.
Ыдыктыг Сака Дава айында Тывага сарыг-шажын дуганнарынга база улуг-биче хүрээлеринге лама башкылар чулалараны кыпсып, судурларны ажып номчуп, аңгы-аңгы езулалдарны эрттирер.
Бо айны чүс муңнуң айы деп база адаар. Чүге дээрге бо үеде буянныг болгаш нүгүлдүг үүлениң күжү чүс муң катап көвүдээр. Чижээ, чаңгыс кижиге ачы-дузаны көргүзерге, чүс муң кижиге дуза көргүскени-биле деңнежир буянныг үүлени чыып алыр, а бир эвес чаңгыс кижиге хора чедирер болза, чүс муң кижиге баък сагыштыг хора чедиргени-биле деңнежир үүлени чыып алыр.
