Ыраккы Кара-Хөл сумузунче дүрген харылзаалыг интернетти кожар

«ВымпелКом» чурагайлыг платформа компаниязы (Билайн) база Тываның Чазаа регионнуң чурагайлыг экономиказын хөгжүдеринче күжениишкиннерин катыштырган.

Петербургтуң делегей чергелиг экономиктиг шуулганының (ПМЭФ-2023) үезинде, ийи тала ооң мурнунда дугуржулгазын беш чылда кады ажылдажылга керээзи-биле быжыглаан.

Тываның Баштыңы Владислав Ховалыг биле «ВымпелКом» ААН-ның күрүне сектору-биле ажылдаар департаментиниң удуртукчузу Михаил Звягинцев документиге атты салганнар.

«Чурагайлыг экономика» национал төлевилел боттандырылгазы-биле ийи тала чурагайлыг экономика адырынга кады ажылдап, регионга ону хөгжүдер планныг. Тыва Республиканың чурагайлыг экономиказын, чурагайжыдылганы база чурагай эде тургузуушкунун хөгжүдеринче, информация-телекоммуникация инфраструктуразын, мобильдиг харылзаа четкизин сайзырадырынче удур-дедир кады ажылдажылганы угландырар.

Ийи тала “угаанныг хоорай” демдектерин хевирлээр угланыышкында чаа информация-телекоммуникация технологияларын хөгжүдеринче, хамаатыларга ачы-дузаның шынарын бедидеринче угланган Wi-Fi, М2М, чаа технологиялар, аудио база видео сайгарылгазы дээн ышкаш технологияларны болгаш аргаларны, информацияның айыыл чок чорук сервистерин (DDos халдаашкыннардан база тарап-нептерээринден камгалал) бодунга ажыглаарынга чедимчелиг болган хемчеглерни боттандырарынга сонуургалдыг.

Тываның Баштыңы Владислав Ховалыг: «Регион чедери берге черлерлиг болгаш, харылзаа инфратургузуун хөгжүдеринге сонуургалдыг бис. Чижээ, Бай-Тайга кожууннуң Кара-Хөл суурже удазын-оптиктиг харылзаа шугумун шөйеринге. Ынчангаш херек кырында биске дузалажыр күзелдиг партнерларга өөрүүр бис. Амгы үениң технологиялары амыдыралывысче чоорту кирип келген болганда, чурттакчы чонга ол болгаш өске-даа ачы-дузалар алырынга эптиг байдалдарны тургузар апаар. «ВымпелКом» чурагайлыг платформа компаниязы ол талазы-биле биске сонуурганчыг. Ынчангаш ам практиктиг кезээнче дүрген шилчиир херек».

«Билайн» соталыг харылзаа компаниязының Тывада салбырының директору Павел Умнов: «Шиитпирлерниң артында кол сорулга – «Билайн» соталыг харылзааның Тывада ажыглакчыларынга чурагай сервистерин чедингир кылдыр кылыры, а ачы-дуза ажыглалын эң таарымчалыг болдурары. Бисти Тываның Чазаа деткип турары, өөрүнчүг-дүр. «Билайн»-биле кады ажылдажылга чүгле күрүне секторунуң эвес, а регионнуң бизнезинге болгаш чурттакчыларынга делгем аргаларны ажыдып, сорулгаларын чедип алырынга дузалаар дээрзинге бүзүрээр мен».

Тывада хамаатыларның айыыл чок чоруун база амыдыралының шынарын бедидер айтырыгларны шиитпирлээринге, регионалдыг болгаш социал ужур-дузалыг өске-даа хемчеглер эрттиреринге медээлер сайгарар технологияларны ийи тала ажыглаар болган. Турисчи агымны улгаттырарынга кылымал угаанны ажыглаарын, ажылдап шыдаар чурттакчы чоннуң миграциязын шинчилээрин, транспорт инфраструктуразын хөгжүдерин, деңзилеп-хемчээр хайгааралды дөзевилеп, тударын дугуржулгада киирген.