«Эң-не тергиин өг» деп чаңчылчаан республика мөөрейинге Мөңгүн-Тайга кожууннуң Кызыл-Хая сумузундан «Арзайты» көдээ ажыл-агыйының хереглел кооперативиниң өө тергиин деп үнелеткенин ТР-ниң Дээди Хуралының депутады Ульяна Монгуш дыңнаткан.
– Республика чергелиг «Эң-не тергиин өг» мөөрейинге шаңналдыг черни алырда, шыңгыы белеткел негеттинер. Ол дээрге көдээ ажыл-агый бүдүрүлгезиниң база сумунуң шеверлерниң кызымаккай болгаш демниг ажылының түңнели-дир. Мөөрейге белеткел барык чыл бурунгаар эгелээр.
Мөген-Бүренниң шеверлериниң Россияның болгаш Тываның сүлде демдектерин кидисте көргүскен ажылдары сеткилимге дыка таарышты. Өг тергиин дериттинген, ширээзинде көшкүн чоннуң аъш-чемин элбээ-биле делгээн. «Арзайтының» коллективинге байыр чедирип тур мен! – деп, депутат чугаалаан.
“Мөген-Бүрен” күрүнениң унитарлыг бүдүрүлгениң хойжузу Эрес-оол Иргит «Наадым-2024» малчыннар байырлалының чемпиону болган. Тываның алдарлыг малчыны Наадымның беш дакпыр чемпиону. “Малчын” күрүнениң унитарлыг бүдүрүлгениң сарлыкчызы Ачыты Донгак ийиги черге, «Сайзырал» көдээ ажыл-агый бүдүрүлгезиниң кооперативиниң сарлыкчызы Чингис Иргит үшкү черге төлептиг болганнар.
