Чедери берге Тере-Хөл кожуунче А. Б. Чыргал-оол аттыг уран чүүл колледжиниң салым-чаяанныг сургуулдары четкен.
Кунгуртугнуң культура одаанга аныяк ыраажылар сураглыг тыва композиторлар Алексей Чыргал-оолдуң, Ростислав Кенденбильдиң, хөгжүм өнчүзүн күүсеткеннер.
Чашкы шаандан дыңнап өскен аялгаларын болгаш ырыларын тере-хөлчүлер диңмиттиг адыш часкаашкыннары-биле хүлээп алган. Концерт үезинде аныяк ыраажылар орус, итали классиктиг хөгжүм операзындан үзүндүлерни онза аянныг күүсеткен.
Концерт эрттирер саналды тус черниң чурттакчызы, уран чүүл колледжиниң дөрткү курузунуң сургуулу Буяна Магбын киирген турган. Буянага база чаңгыс курсчуларынга аңгылап бергени автотранспортка 12 артист-биле кады келгеш, чаңгыс чер- чурттугларынга уттундурбас хөгжүм байырлалын бараалгаткан.
Ыраккы Тере-Хөл кожуунга бо культурлуг хемчег «Ойна» алдын тывыш артелиниң деткимчези-биле эрткен. Аныяк ыраажылар биле алдынчылар «эвилели» тере-хөлчүлерни ыры-хөгжүм делегейиниң аян-чоруунче ынчалдыр чалап, «эжиндирген».
