Саха (Якутия) Республикага «Ысыах Олонхо» деп байырлалдың «Өгбелерниң өнчүзү» деп аъттың дериг-херекселиниң Россия чергелиг мөөрейи июль 1-2-ниң хүннеринде болуп эрткенин Тыва үндезин культура төвү дыңнаткан.
Ук мөөрейге Тыва Республиканың Улустуң ус-шевери Кенин Сат база узаныр уран чүүл делегейиниң шылгараңгай ус-шевери, мерген адыгжы, Тыва үндезин культура төвүнүң ажылдакчызы Артыш Монгуш киришкеннер. Мөөрейниң I шаңналдыг черин Тываның Улустуң ус-шевери Кенин Сат чаалап арган, а II шаңналдыг черинге Артыш Монгуш төлептиг болган.
Сураглыг дарган Кенин Сат биле ус-шевер Артыш Монгуш шилип алган мергежилдеринге бердинип, узаныр уран чүүлдүң сайзыралынга улуг үлүг-хуузун киирип чоруур ховар салым-чаяанныг кижилер. Оларның кылган ажылдарын чүгле бистиң чуртувустуң улузу эвес, хөй-ле даштыкы чурттарның төлээлэри, аңгы-аңгы язы-сөөктүг кижилер эдилеп, амыдыралында ажыглап чоруурлар.
Россия чергелиг мөөрейге төлептии-биле киришкени дээш, шаңналдыг черлерге төлептиг болган сураглыг дарган биле ус-шеверге Тыва үндезин культура төвү байырын чедирген.
