Тыва үндезин культура төвүнге Донгак Окаанчык аттыг ыяштан биче хевирниң скульптура чазап-сиилбиир IV республика чергелиг мөөрейиниң ажыдыышкыны болуп эрткенин төп дыңнаткан.
Мөөрейниң негелдези езугаар ус-шеверлер дөрт хонуктуң дургузунда ыяштан бедии 20 сантиметр биче хевирниң скульптураларын сиилбип кылыры көрдүнген. Ук ажылдарны жюри кежигүннери октябрь 1-де үнелеп түңнээр.
Ажылдарның темалары: Тываның алдарлыг кижилери, төөгүзү, аас чогаал болгаш тыва чоннуң үндезин амыдыралга хамаарышкан ажылдарны кылып болур.
Киржикчилерни шиидип, үнелел бээр жюри кежигүннери:
- Сай-Суу Донгак – Конгар-оол Ондар аттыг Тыва улустуң езу-чаңчылдарының, аас чогаал болгаш ус-шеверлер төвүнүң эртем килдизиниң удуртукчузу;
- Сайдаш Момбужай – Тыва Республиканың улустуң ус-шевери;
- Александр Ойдуп – мөөрейниң жюри кежигүннериниң удуртукчузу – скульптор, Россияның чурукчулар эвилелиниң кежигүнү Тыва Республиканың уран чүүлүңүң алдарлыг ажылдакчызы.
Тыва төп ус-шеверлерге чедиишкинниг шудургу ажылдаарын, ыяштан хуулгаазын, онзагай чараш скульптураларны чазап-сиилбиирин күзээн.
