Үжен ийи муң литр арага аймаан хавырган

ТР-ниң Лицензия талазы-биле албан чери корум-чурум камгалаар органнар-биле кады чажыт арага садыг-саарылгазындан 32 муң литр арага аймаан хавырган.

Тываның ажыл-чорудулганың чамдык хевирлеринге чөпшээрел бээр база хайгаараар албаны республиканың корум-чурум камгалаар органнары-биле кады, 2023 чылда арага продукциязын үүрмектеп садар адырда 278 чурум үрээшкиннерин илереткен.

Лицензия талазы-биле албан чериниң ажылдакчылары кирген албан черлер аразының рейдилери республиканың чурттакчылыг черлеринче, ол ышкаш «Ак» биле «Шивилиг» орук-хайгыыл албанының доскуулдарынче неделя санында үнүп, 32 муң ажыг литр чажыт арага продукциязын хавырган.

Албан чериниң удуртукчузунуң албан-хүлээлгезин күүседип турар Эртине Намдан хайгаарал албан чериниң эрткен чылда ажыл-чорудулгазының түңнелдерин коллегия хуралында илеткээн.

Лицензия талазы-биле албан чериниң корум-чурум камгалар органнар-биле кады дээштиг ажылының сөөлгү болуушкуну январь ортан үезинде, «Шивилиг» постузу таварыштыр 1185 литр пиво продукциязын эрттирип бар чорда илереткеш, хавырганы болур.

2022 чылдан бээр албан чериниң хыналдалар эрттирерин кызыгаарлаан-даа болза, ажылдакчылар профилактиктиг хемчеглерни уламчылап турар. Кызыл хоорайда база Эрзин кожуунда үш садыг чаңгыс эвес удаа чурум үрээш, чөпшээрелин алдырткан, Кызыл хоорайда «Кайлас» ресторанының арага продукциязы үүрмектеп садар лизенциязын күш чок болдурган.

Арага продукциязы садып-саарар адырда хоойлу-чурум үрекчилеринге 280 муң рубльге административтиг торгаалды салган.

Республика девискээринде арага продукциязын садып-саарар чөпшээрелдиг 72 организация бар, оларның эң хөйү – Кызыл хоорайда. 2023 чылда албан чери арага аймаан үүрмектеп садар адырдан 6,6 сая рубль хемчээлдиг үндүрүгге хамаарышпас орулганы республика бюджединче киирген, эрткен чылдың ол үезинге деңнээрге беш катап хөй.

Арага продукциязынга акцизтерни үлээш, арага аймаан ажык-чарлыг садып-сайгарганындан республика бюджединче 139,2 сая рубльди кииген, планны 28 хуу азы 30,3 сая рубльге ажыр күүсеткен.

ТР-ниң ажыл-чорудулганың чамдык хевирлеринге лизенция бээр база хайгаараар албан чериниң ажыл угланыышкыннарының бир хевири – арага аймаан үүрмектеп садып турарынга чөпшээрел барын хынаары.