Cүт-Хөл кожууннуң Кара-Чыраа сумузундан беш ажы-төлдүг Чимис Жукова 2020 чылда хеп даараар черни ажыдып алган. Шевер социал керээге үндезилээн күрүне деткимчези-биле даараныр машиналарны, хеп кедирер херекселдерни, пөс-таавы садып алган.
Дааранылга чериниң чагыглары үзүлбес. Ында национал болгаш концерт хептерин даарап турар. Улуг оглу биле уруу Чимис Жукованың дузалакчылары.
– Чурттакчы чон аржааннаар үеде шыва тоннарны чагыдып эгелээр. Ол ышкаш дагылга үезинде улус тыва хевин кедип алгаш, езулалга киржир апарган. Сөөлгү үеде өгленишкен аныяктар эжеш тоннарны база чагыдып турар.
Машина иштинге бут адаанга чадыгларны улуг оглум даарап турар. Өртээ 3600 рубльден өрү. Чадыгны улус хөйү-биле чагыдар. Уруум Сырга албан черлериниң ажылдакчыларының чагыы езугаар национал шинчи-биле хептерни даарап турар. Оон аңгыда чаңгыс аай өөренип кедер хепти, шодак-судакты, тыва бөрттерни, тоннарны, чең чок хөректээштерни, концерт хептерин даарап турар бис – деп, шевер ажылын таныштырды.
Чимис Жукова республика чергелиг «Ойнаар-кыстар хүрээлеңи» делгелге-мөөрейге ажылдарын киириштиргеш, шаңнаткан-даа. Ол июнь 12-де Кызылга болуп эртер “Кавай фестивалы” деп онзагай хемчегге киржир дээш белеткенип турар.
– Фестивальга кавайлар болгаш камгалал-сагыызыннар делгелгезинге киржир бис. Бараалгадыр кавайывыстың адаанда энчекти чаткан, ооң кырында эттээн хураган кежин салган. Кавайның болгаш чаш уругнуң камгалалдары турар. Кавайга чоруур камгалал – ойнаар-кыс дүрзүлүг ээрен болур. Ону кавайның бажынга азып каар. Бир хардан үш харга чедир уругларның ойнаарактарын болгаш идик-хевин белеткеп тур бис.
Шевер тозан чылдарда Тээлиге дааранылга комбинадынга даараныкчы мергежилди чедип алган. Ол билиин доктаамал бедидип, Кызылда “Этноковоркинг” төвүнге чиңгине тыва хепти даараарын база өөренген. Чимис Жукова «Социал керээ» программазы ажыл-херээн ажыдып алырынга дөгүм болганын онзалап демдегледи.
Жуковтарның өг-бүлези шуптузу ус-шевер болду. Өгнүң эр ээзи аңгы-аңгы эт-сеп аймаа чазап, бажыңның кастыктарын, соңгаларын болгаш эжиктерин, орун, шкаф, стол, сандай дээш шуптузун чазап кылыр.
Чуруктарны Шончалай Ховалыг тырттырган
#Сүт_хөлкожуун #Кара_чыраа #Социалкерээ #ТМГМедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews
