Бай-Тайганың ус-шеверлериниң бирээзи Экер-оол Салчактың 50 харлаанынга тураскааткан хууда ийиги делгелгези Тываның Алдан-Маадыр аттыг Национал музейинге болуп эрткенин чагырга чери дыңнаткан.
Хөйге билдингир чурукчу, даш, ыяш база сөөк оярынга болгаш өске-даа хевирлерниң уран чүүлүнге мастер Экер-оол Салчактың ажылдарының делгелгезин музейниң директору Каадыр-оол Бичелдей ажыдып, ооң ажыл-ижиниң дугайында делгереңгей тайылбырны берген. Бай-Тайга кожуун кожууннуң чагырга даргазы Чингис Салчак ус-шеверге "Бай-Тайга кожууннуң улустуң мастери"деп хүндүлүг атты тывыскан.
Экер-оол Салчак амгы үеде республиканың эң-не тергиин сөөктен янзы-бүрү хевирлер оюп чазаар мастери. Ооң ажылдары бистиң делгем чуртувуста чонну магададып, хөй санныг делгелгелерге, мөөрейлерге алдаржып сурагжаан. Дээди профессионал эртемниг чазаныкчы мергежилиниң талазы-биле кижизидилге чорудуун тургузуп, амгы үеде сургуулдарны өөредип турар.
Бай-тайгажылар ус-шевер чаңгыс чер чурттуунга ак орукту, ам-даа бедик чогаадыкчы ажыл-ишти, салым-чаяанныг өөреникчилерни болгаш быжыг кадыкшылды күзээн.
