Бөгүн Тывада Хөй ажы-төлдүг өг-бүлелер хүнү. Өвүр кожууннуң ном саңы Альберт биле Аяна Майындыларның өг-бүлезин таныштырган.
Өгнүң эр ээзи культура адырында хөй чылдар дургузунда ажылдап турар, дайынчы хөделиишкиннер хоочуну, кожууннуң хол бөмбүүнге хоочуннар командазының ойнакчызы. Өгнүң херээжен ээзи Чаа-Суурнуң көдээ ном саңының эргелекчизи. Ол «Доржу Чургуй-оол Михайлович» деп биобиблиографтыг айтыкчының тургузукчузу, «Чаа-Суурнуң ат-сураглыг ажыл-ишчилери» деп айтыкчыны үндүрген. Кожууннуң спортчу аваларының бирээзи.
Хөй-ниитижи, үлегерлиг өг-бүле – Майындылар беш ажы-төлдүң ада-иези. Улуг оглу Ачыылай Улан-Удэ хоорайның авиация техникумун дооскаш, амгы үеде авиация заводунда ажылдап турар. Уруу Аялика Тываның күрүне университедин чедиишкинниг дооскан. Ол найысылалдың билдингир чараштаныр салоннуң мастери. Оолдары Ал-оол Тываның политехниктиг техникумунда бирги курстуң сургуулу, Ай-Хевис Чаа-Суур школазының онгу классчызы. Бичии кызы Алдын-Хээ Чаа-Суур сумузунуң уруглар садынче барып турар.
Эрткен чылын Тываның Баштыңы Владислав Ховалыгның саналы-биле тургустунган байырлал – Хөй ажы-төлдүг өг-бүлелер хүнүн Тыва сентябрь 19-та демдеглээрин сагындыраал.
Чылдың-на сентябрьның үшкү субботазында эртип турар ол байырлал өг-бүлениң, ада-иениң онзагай ролюн, хөй ажы-төлдү кижизидериниң чаңчылдарын көргүзер сорулгалыг.
