Тываның Аныяктар херектериниң талазы-биле яамызы Тываның Аныяктар эвилели-биле кады студентилерниң чогаадыкчы чоруунуң болгаш хөй-ниити ажыл-чорудулгазының адырында «Чылдың сургуулу-2025» Национал шаңналдың регионалдыг чадазынче билдириишкиннер хүлээп алыышкыны эгелээнин дыңнаткан.
Өөредилге, эртем, чогаадыкчы, спортчу, хөй-ниити ажыл-чорудулгазынга онзагай чедиишкиннерни көргүскен Тываның ортумак профессионал өөредилге черлериниң сургуулдарын илередип, деткиири-биле шаңналды тургускан. Мөөрей студент амыдыралда бедик чедиишкиннерни үнелеп, нептередир сорулганы салган.
Республиканың ортумак профессионал өөредилге организацияларындан айыттынган адырларда көскү чедиишкиннерни чедип алган сургуулдар мөөрейге киржир. Билдириишкиннерни болгаш херектиг бөлүк документилерни 2025 чылдың октябрь 24-ке чедир хүлээр.
Регионалдыг чадага тиилээн сургуулдар «Чылдың студентизи-2025» национал шаңнал мөөрейиниң федералдыг деңнелинге бодунуң чедиишкиннерин камгалаар эргени алыр.
Национал шаңнал дээш мөөрейге киржилге студентилер шимчээшкинин нептередиринче, талантылыг аныяктарны илередип база деткииринче, российжи деңнелге Тыва Республиканың эки ат-алдарын быжыглаарынче угланган күрүнениң аныяктар политиказын боттандырарынче базымны бээр.
Мөөрейниң эрттер чурумунуң база чагыг киирер негелделериниң дугайында немелде тайылбырны алырда, дараазында адресте Тываның Аныяктар херектериниң талазы-биле яамызындан билип алыр: Кызыл хоорай, Кочетов кудумчузу 72, 2-ги каът, харылзажыр телефону: +73942277070.
