Бөгүн Тываның кадет корпузунга Тываның Улустуң чогаалчызы Мария Күжүгеттиң чырык адынга болгаш 70 харлаанынга болгаш болгаш чогаадыкчы ажыл-чорудулгазынга тураскааткан "Сакты бердим, өңнүктерим" деп республика чергелиг эртем-шинчилел конференциязы болуп турар.
Тываның гуманитарлыг болгаш тускай социал-экономиктиг шинчилелдер институдунуң директорунуң эртем талазы-биле оралакчызы, ТР-ниң эртеминиң алдарлыг ажылдакчызы, чогаал шинчилекчизи Уран Донгак, К.Б. Ондар аттыг Тыва үндезин культура төвүнүң директору Игорь Көшкендей, ТывКУ-нуң тыва филилогия болгаш ниити дыл эртеминиң кафедразының эргелекчизи, доцент Айлаңмаа Соян, чогаалчылар, башкылар, журналистер болгаш өскелер-даа илеткелдерни номчаан.
Чоокта чаа Мария Күжүгеттиң тургускаш удуртуп чораан "Сорунза" чечен чогаал каттыжыышкынының кежигүннериниң шүлүктери болгаш калбак чогаалдары чыгдынган баштайгы ному чырыкче үнген. «Сорунзачылар» ук номну башкызынга тураскаадып, ооң база бир күзелин боттандырганы ол. Номнуң даштыкы каасталгазы, чурукчузу – Россияның культуразының алдарлыг ажылдакчызы, Тываның Улустуң чурукчузу Начын Шалык.
Тываның Улустуң чогаалчызының номнарын делгээн.
Хүннүң ийиги чартыында конференцияның түңнелдерин үндүрүп, хемчегни байырлыг байдалга хаар.
Эртем-шинчилел конференциязын Тыва Республиканың Чогаалчылар эвилели, Тываның кадет корпузу, Р.Р. Бегзи аттыг Тываның өөредилге сайзырадыр болгаш билиг бедидер институдунуң деткимчези-биле эрттирип турар.
Чуруктарны Буян Ооржак тырттырган
