Тываның кадет корпузунга "Езулуг эр кижи – кымыл ол?" темалыг солун ужуражылга болуп эрткенин өөредилге чериниң тыва дыл болгаш чогаал башкызы Лидия Ооржак дыңнаткан.
Россияның спорт мастери, WBO Oriental чемпиону, Евразияның бокс талазы-биле парламентиниң чемпион курунуң эдилекчизи Артыш Лопсан школаның аалчызы болган.
«Аът болуру кулунундан, кижи болуру чажындан», «Аныяан сургап өөредир, аътты баглап өөредир» дээр. Езулуг эр кижи авазынга, кыс уругларга чымчак болур, бичиизинден эгелеп өгнүң эр ээзи болурунга белеткенип чорууру артык болбас дээрзин, эр кижиниң сагыыр дүрүмнерин сактып чугаалашканнар.
Кижилер бот-боттарын ылгашпайн, эптиг-демниг, найыралдыг, багай аажы-чаңга алыспас, өске улус эдерип чурттавас дээрзин амыдыралчы чижектер-биле холбап, сайгарып көргеннер.
– Мага-бодун шыырак, күштүг кылдыр дадыктырып алган спортчу кижи черле күштүг болур. Ол күжүнге бардамнанмас, бодундан кошкак кижилерни куду көрүп, кончуургаары шын эвес. Езулуг эр кижи кажан-даа ынчанмас, а херээжен кижилерже хол көдүре бээр кижилерни эр дээр бе? Ынчангаш кижи бодун хайгааранып чоруур, эрлер, бодунда бар хей-аъдын кудулатпас, кандыг-даа кижилерге дузазын кадып чоруур кылдыр бодун белеткээр, ону чаңчылы кылып алыр. Ийе, амыдыралда аштырыышкыннар-даа, бергелер-даа кижиниң мурнунга туруп кээр. Ол аштырыышкыннарны, чамдыкта улустуң анчыг чугааларын безин кижиге күчү-күш бээр эки чепсек деп бодап аар. Ол "чепсектиң" күжү-биле кижи чедиишкиннерге чеде бээр» – деп, Артыш Лопсан өөреникчилерге арга-сүмени берген.
Ужуражылга чогаалчы Саая Майнактың:
«Оо, эр кижи!
Одагалыг бөргүңнү кеткеш,
Оттук-бижээң астып алгаш,
Эр кижиниң сүр-күштүүн,
Эрес-омаан көргүзүп чор.
Каржы-дерзии үүлгедиглерден
Хамык чонну камгалап чор.
Чуртту ээлеп, чонну баштап,
Чуртталгага ынак чор» деп шүлүү-биле доозулган.
Оолдарның хей-аъды бедик, хөглүг, сонуургаан айтырыгларын салып, аалчызы-биле тырттыржып ап шаг-ла болганнар.
Эки өөредилгелиг, кикбоксинг спорттуң хевиринге шыырак түңнелдерлиг өзүп орар тергиин спортчу, 9-ку класстың өөреникчизи Аюш Лама аалчыга эш-өөрүнүң мурнундан өөрүп четтиргенин илередип, чагаан, сургаан сөстери улуг деткимче болганын чугаалаан.
