Тыва үндезин культура төвүнге Тываның Улустуң хөөмейжизи Эдуард Дамдынның тыва хөгжүм херекселдериниң бирээзи – дошпулуурнуң хылдарын чаңчылчаан технология-биле белеткеп кылган улуг ажылының түңнелин таныштырган хемчег болуп эрткенин төп дыңнаткан. Ол хөөмей-сыгыт күүседип бараалгадып билир салым-чаяанындан аңгыда, хөй талалыг бот-тывынгыр уран-шевер мастер база болуп турар.
Өгбелеривистен дамчып келген өнчүзү болур тыва хөгжүм херекселин ойнаарынга таарыштыр кылып алыр материалдар кандыызы-даа бар апарган сайзыраңгай үеде келген бис. Ынчалза-даа үндезин хевиринде кандыг, канчалдыр кылып турган деп чүүлдерни катап оттуруп, ону шенеп, бодунуң холу-биле тудуп тургаш кылган түңнелиниң ажылын алдын холдуг ус-шевер тайылбырлап, чыглып келген улуг-биче чонунуң сонуургаан айтырыгларынга харыылап, билиглери-биле үлешкен.
Шаандан бээр-ле хөгжүм херекселдерин кылырда кандыг-даа демир-дес ажыглавайн колдуунда-ла малдың кежинден, ишти-хырнындан, аъттың челинден дээн чижектиг чүүлдерден белеткеп кылыр турганы кайгамчык. Ооң чижээн көргүскен дошпулуурнуң хылдарын кылганының дугайында видеоматриалды көргүзүп үндүрерин төп дыңнаткан.
