ТывКУ-нуң доозукчузу, химия башкызы Буянмаа Донен эрткен чылын «Мен – башкы мен» төлевилелге киржип, Шагаан-Арыг хоорайның гимназиязынга күш-ажылчы базымын эгелээнин ТР-ниң Өөредилге яамызы дыңнаткан.
Аныяк башкының чугаалап турары-биле алырга, чыл дургузунда ол өөреникчилеринге чаңчыгып, хүн бүрүзүнде чаа-чаа арга-шинектерни, башкылаашкынның чаа арга-методтарын тыварынга өөренип алган. Уруглар-биле кады Буянмаа Олеговна бергелерни ажып эртип, нарын айтырыгларны шиитпирлеп, өөреникчилерин чедиишкинче углап турар.
– Мээң бир дугаар күш-ажылчы чылым эрткен. Ында уттундурбас сактыышкыннар хөй. Өөредилге чылының эгезинде дүвүрээзин турган – кичээлдерни эрттирери, чаа таныжылга база бодумнуң бодалдарымны амыдыралче боттандырары. Кичээлдерге белеткенип тургаш, ооң планын тодаргайы-биле тургузуп, көргүзүг материалдарын ажыглап турдум. Өөреникчи бүрүзү кичээлден бодунга солун чүүлдү билип алыры чугула. Школаның улуг өг-бүлезиниң кежигүнү болганымга өөрүүр мен. Коллегаларымга база өөреникчилеримге меңээ көргүскен бүзүрели, деткимчези дээш четтиргенимни илереттим» – деп, Буянмаа Донен чугаалаан.
«Мен – башкы мен» төлевилел регионнуң өөредилге системазының хөгжүлдезинде кол рольду ойнап турар болгаш, школаларже аныяк кадрларны хаара тудары, өөреникчилерниң билииниң шынарын бедидеринге, аныяктарның чогаадыкчы арга-шинээн сайзырадырынга дузалаар. Ук төлевилелдиң ачызында аныяк башкыларның арга-шинээ илереттинип, регионнуң өөредилге адырының келир үезинче улуг үлүг-хуузун киирер аргалыг.
«Дагдыныкчыларым – Урана Спартаковна, Елена Сергеевна база и Анай-Кара Баз-ооловнаны демдеглевес аргам чок. Оларның деткимчези болгаш арга-сүмези деңнеп четпес үнелиг. Кижи бүрүзү бодунуң арга-дуржулгазы-биле үлежип, нарын байдалдарны шиитпирлээринге дузалажып, харын-даа мени дыңнаарынга кезээде белен. Уруглар-биле кады ажылдажылга, башкылаашкынның арга-методтарынга хамаарышкан сүмелери мээң ажылымның кол үндезини болган» – деп, аныяк башкы дагдыныкчыларынга четтиргенин илереткен.
Тывада 2021 чылдан бээр «Мен – башкы мен» төлевилел боттанып турар. Төлевилел 336 салым-чаяанныг, боттарының арга-дуржулгазы база билиглерин регионнуң школачылары-биле үлежиринге белен аныяк башкыларны хаара туткан.
