«Сүбедей» спорт өргээзинге Күчүтен мөге Аяс Моңгуштуң шаңналы дээш хүрештиң аңгы-аңгы хевирлеринге бүгү Россия чергелиг маргылдаа болуп эрткен.
Маргылдаа ийи хонук уламчылааш, бөгүн сумо хүрежинге Россияның, Европаның болгаш делегейниң хөй удаа чемпиону, Наадымнарның 17 дакпыр тиилекчизи Аяс Моңгуштуң төрүттүнген хүнүнде доозулган. Чалыы спортчулар самбо, хүреш, хостуг хүреш, сумо болгаш дзюдога күжүн шенээннер.
Маргылдааның хүндүлүг аалчызы болуп Тыва Республиканың Дээди Хуралының даргазы Кан-оол Даваа база четкен. Ол Тываның Баштыңы Владислав Ховалыгның болгаш Дээди Хуралдың депутаттарының мурнундан алдарлыг мөге Аяс Моңгушка мугур 50 харлааны-биле байыр чедирген.
– Наадымнарга 17 катап шүүлген Күчүтен мөге, сумо хүрежинге Россияның, Европаның болгаш делегейниң хөй удаа чемпиону өзүп орар салгал-биле арга-дуржулгазын үлежип турарынга аажок өөрүп тур бис. Ол дээрге ооң Тывага спорттуң болгаш тыва хүреш школазының сайзыралынче, келир үениң чемпионнарын кижизидеринче канчаар-даа аажок улуг үлүг-хуузу-дур. Бо маргылдааның чалыы киржикчилериниң аразында Тывавыстың адын алдаржыдар келир үениң чемпионнары бар дээрзинге бүзүреливис улуг – деп, Каң-оол Даваа чугаалаан.
Оон аңгыда, Дээди Хуралының даргазы хүрештиң аңгы-аңгы хевирлеринге маргылдааны эрттирип турары дээш Аяс Моңгушка, спортка бердингени, кадык-чаагай амыдыралче чүткүлү, өөрлериңерге үлегерлиг чижек болуп чорууруру дээш аныяк мөгелерге четтиргенин илереткен.
