Тыва үндезин культура төвүнге Тываның салым-чаяанныгларының бирээзи, дүктен хол-биле уран-шевер кылыглар кылып, ону янзы-бүрү кылдыр болбаазырадыр база республикавыста тыва чоннуң бурун амыдыралындан келген хөвең ышкаш хоюг, чымчак дүктүг кидизин чараштап кылыр шеверлерниң баштайгы базымнарын кылып эгелээн, билдингир ус-шевер – Саглаш Барыңмааның чогаадыкчы ажыл-ижинге тураскааткан хууда делгелгезиниң байырлыг ажыдыышкыны болуп эрткенин төп дыңнаткан.
Шевер хөй санныг республика, регионалдыг база делегей чергелиг мөөөрейлерниң, делгелгелерниң идепкейлиг киржикчизи, тиилекчизи база ол ышкаш дүкке хамаарышкан өөредиглиг кичээлдерниң эрттирикчизи болуп, ниити дүктен болгаш кидистен кылыр ажылдарның салым-чаянныг ус-шевери болуп чоруур.
Кургаг болгаш өл кидистиң техниктиг аргаларын ажыглавышаан дүктен, кидистен кылган өңгүр каас-коя хептен эгелээш, эт-херекселдерниң каасталгаларынга чедир чараш ажылдарын чыглып келген чонунга сонуургадып, таныштырган. Ооң дүктен кылган чараш кылдыныглары чон аразынга онзагай болуп, амгы үениң культуразының тускай коду болуп турар дээр болза чазыг эвес.
Байырлыг хемчегге ус-шеверниң чоок кижилери, чаңгыс чер чурттуглары, кады ажылдап чораан эш-өөрү чыглып, ооң чогаадыкчы үре-түңнелдиг ажыл-ижин деткип, чылыг-чымчак байыр сөстерин чедиргеннер.
Саглаш Барыңмааның кылып чоруур ажылынга бердингенин онза демдеглеп, Тываның культура база экономиктиг хөгжүлде болгаш үлетпүр яамылары, Кызыл кожууннуң чагырга чери шеверге шаңнал-макталдарны тывыскан.
