Аржаан школазынга, эрге-хоойлу билиглериниң неделязында, Бии-Хемниң район судунуң даргазының дузалакчызы Алина Донгак, кожуун прокурорнуң оралакчызы Артыш Монгуш-биле ужуражылга болуп эрткенин чагырга чери дыңнаткан.
Ужуражылга үезинде назы четпээннерниң административтиг болгаш кеземче харыысалгазының, кем-херек үүлгедиишкиннериниң уржуктарын, каш харлыындан эгелеп кеземче херээнге онаажып болурунуң дугайында тайылбырлаан.
Суд практикаларының үлегерлерин чижекке ап, назы четпээн уругларның хоойлу хажыдарының чылдагааннарын чугаалап, сайгарылганы кылган.
Кожууннуң прокурорнуң оралакчызы амгы үеде нептереңгей бузурукчу чорук дугайында тайылбырлаан. Бузурукчулар оорлаан акша-хөреңгизин боттарынче шилчидер дээш, аныяк-өскенни ажыглап турарын айыткан.
Бии-Хемниң район судунуң шииткекчизиниң дузалакчызы – Аржаан школазының доозукчузу Алина Донгак. «Кижи бүрүзү хоойлуга чагыртыр, назы-хар барымдаазы чокка, бодунуң үүлгеткен херээ дээш харыылаар ужурлуг» – деп, ол үстүкү класстың өөреникчилеринге чугаалаан.
Школачылар хоойлу-дурум билбес чорук харыысалгадан хоставас деп билип алган.
