Тываның Чазааның деткимчези-биле «Улусчу фронт. Бүгү чүүлдү тиилелгеже!» төлевилелди боттандырып, Шагаа уткуштур дузаламчы чыыр кампания уламчылавышаан.
«Деткимче» фондузу дайынчыларны машина-техника, аар чъүк автомашиналарны кывар-чаар материал-биле хандырып турар.
–Тываның Баштыңының даалгазы-биле «Деткимче» фондузу тускай шериг операциязынче чъүк чедирер автомашиналарга кывар-чаар материал садар 850 ажыг муң рубльди аңгылаан. Аңаа немей дайынчыларга техниктиг херекселдер, мотоцикл садары көрдүнген.
Дайынчы хөделиишкиннер девискээринче 20 тоннаның, Донецк база Курск талазынче беш-беш тоннаның чүък машиналары углаптар. Шупту чүъктүң ниити деңзизи 30 тонна болур» – деп, фондунуң директору Артыш Иргит дыңнаткан.
Бөгүн Кызыл, Сүт-Хөл, Тере-Хөл, Каа-Хем, Тожу, Тес-Хем, Таңды кожууннарның төлээлери ээлчеглиг ачы-дуза чүъгүн дамчыткан.
Ыраккы Тере-Хөл кожууннуң чагырга даргазы Вячеслав Мижит чаңгыс чер чурттугларының мурнундан хой биле сарлык эъдин, генератор, бензин-биле ажылдаар хирээни, агаар үрдүрүкчүзүн, чылыг уктарны эккелгенин дыңнаткан. «Чоокта чаа кожуунувуска Улусчу фронтунуң Тывада салбыры, Россияның буддистер ассамблеязы, Тываның Камбы-Лама эргелелиниң төлээлери, Тыва үндезин культура төвүнүң артистери Шагаа уткуштур тускай шериг операциязында киржип турар дайынчыларга ачы-дуза чыылдазын чорудары-биле келген. Тере-хөлчүлер ужуражылгага идепкейлиг киржип, акша-төгерикти шыдаар шаа-биле өргээн» – деп чагырга даргазы чугаалаан.
Тес-Хем кожууннуң көдээ ажыл-агый эргелелиниң удуртукчузу Олимпиан Чургуй-оол тараачын арат ажыл-агыйлыгларының даргалары Ундес Чангы-оол, Ахмед Чаймаа, Март-оол Шокар, Орлан Ойдуп, Алим Донмит, Урана Долгар ачы-дуза чыылдазының доктаамал декикчилери дээрзин онзалап демдеглээн.
Улусчу фронтунуң төлээзи Самба Норбужуктуң дыңнатканы-биле алырга, бо хүнде 16 кожуун чүъгүн хүлээткен, дайынчыларже чорудар 4,5 ажыг тонна эът дужааттынган. Ол ышкаш машина-техника, эът, аъш-чем аймаа, чылыг идиг-хеп дээш дайынчыларга чугула херек оон-даа өске чүүлдер чыгдынган.
Ай санаашкыны-биле Чаа чыл – Шагаага уткуштур дайынчыларга ачы-дуза чедирер акция февраль 10-га чедир уламчылаарын сагындыраал.
Кижи бүрүзү тиилелгени чоокшулаштырар дээш үлүг-хуузун киирип, ачы-дуза чыылдазынга катчып болур.
Тускай шериг операциязында киржип турар дайынчыларга ачы-дуза чыыр пункт дараазында адрестерде ажылдап турар: Кызыл хоорай, Чульдум кудумчузу, 40А, өрээл 20, 21. (Улусчу фронтунуң регионалдыг салбыры), Ленин кудумчузу, 5 (Тываның күрүне университединде «Кады бис» штавы), Правобережная кудумчузу, 4 (Көдээ ажыл-агый рыногу). Харылзажыр телефону: +7 (39422) 2-10-50.
