Аржаан сумузунга корум-чурум талазы-биле байдалды сайгарган чон чыыжы болуп эрткенин чагырга чери дыңнаткан. Аңаа 11 айның түңнелдерин үндүрген.
Бии-Хемниң прокурорунуң оралакчызы Арслан Ямбиль, кожууннуң чагырга даргазының корум-чурум талазы-биле оралакчызы Саян Бай-Кара, “Ада-чурттуң камгалакчылары” күрүне фондузунуң салбырының кожуунда социал координатору Шимит Сувак, кожууннуң хөй-ниити чөвүлелиниң даргазы Александр Сат, сумунуң участок төлээзи Айдаш Монгуш болгаш өскелер-даа аржаанчыларның айтырыгларынга тодаргай харыыларны берген.
Мал-маган тудуп турар көдээ ишчилерге кадатче хайгаарал чок мал-маганын үндүрбезин айтып, малдың ээзи административтиг херекке онаажып болурун сагындырган.
Корум-чурум, арагалаашкын-биле демиселди күштелдирерин чугаалашкан. Чон чыыжының киржикчилери эрге-хоойлу, чагырга, культура, социал албан черлериниң ажылдакчылары, депутаттар, адалар болгаш аныяктар чөвүлелдери, улусчу дружиналар демнежип, хыналда үнүүшкүннерни доктаамал шыңгыы чорудар шиитпирни үндүргеннер.
