Красноярскиниң «Енисей» медиашуулганынга бүгү Россиядан 1000 ажыг массалыг информация чепсектериниң, парлалга албанының, реклама адырының төлээлери, блогерлер, келир үениң журналистери киришкен.
Сибирьниң кол медиаболуушкунун Красноярск крайның парлалга болгаш массалыг коммуникация агенилели эрттирип турар. XIII регионнар аразының
шуулганында «Тывамедиагрупп» парлалга бажыңының төлээлери база киржип келген.
Ийи хүннүң дургузунда 30 ажыг шөлчүгешке 40 хире эксперт аңга-аңгы темаларга («чурагайлыг дааш-шимээн», чижилгелиг хүрээлел, информастыг дайыннар үезинде номчукчуларның бүзүрелин болгаш кичээнгейин хаара тударының айтырыглары) арга-сүмези-биле үлежир.
«Роскосмостуң» космонавтызы, чаңгыс чер чурттуувус, «космиктиг блогер» Кирилл Песков шуулганның спикери болган.
Космонавт чаңгыс чер чурттуувус Тывага аалдап кээрин аазаан.
Космонавтика хүнүн уткуштур Кирилл Песковтуң космосче ужудуушкуну чүгле Тываның эвес, а бүгү Сибирьниң чурттакчы чонунга чоргааранчыг болуушкун болган. Бистиң космонавтывыс бир дугаар орбитаже ужуп үнген.
Тывага төрүттүнген космонавт бодунуң ук-дөзүн сактып чоруур болгаш, космосче төрээн республиказының тугун ап алганын сагындыраал. Ол ужудуушкун үезинде орбитадан экипажтың ажылының болгаш амыдыралының дугайында таныштырып, чуруктар болгаш видео-материалдар-биле бодунуң каналынга идепкейлиг үлежип турган.
Делегей чергелиг экипаж бо чылын алды айның дургузунда космоска тургаш, 200 ажыг эртем шинчилелдерин болгаш шенелделерни кылып чоруткан.
