Бүгү-делегейниң улуг назылыглар хүнүн уткуштур «Тимуржу дуза» акцияның чорудуу-биле Кызыл хоорайның 9 дугаар гимназиязының 10 «б» клазының өөреникчилери культураның болгаш уран чүүлдүң хоочуну, Кызыл хоорайның культура төвүнде чурукчу-декоратор Орлан Ондар-оолдуң өг-бүлезинге дузалашканын республиканың немелде өөредилге сайзыралының төвү дыңнаткан.
«Орлан Монгушевич – чүгле амыдыралчы ада эвес, а регионнар аразының хөй-хөй шаңналдарның эдилекчизи. Аңаа 2008 чылда Үстүү-Чадаананың хүрээзин катап тургузарынга киирген үлүг-хуузу дээш өөрүп четтириишкинниң бижиин тывыскан. Ол ышкаш 2021 чылда Кызыл хоорайның мэриязының «Ынакшыл болгаш шынчы чорук» медалынга Өг-бүле хүнүн уткуштур төлептиг болган. «Сибирьниң ус ажылы» регионнар аразының делгелгезинге киржилгези дээш Томск Облазының культура департаментизинден өөрүп четтириишкин бижиинге төлептиг болган. Ооң шаңнал-макталдарын санаар болза, оон-даа хөй. Бо чүгле ооң чартыы-дыр» – деп, 10 «б» класстың башкызы Долаана Монгуш демдеглээн.
Школачылар изиг күзелдии-биле акцияга киришкен. Оларның «тимуржу дузазы» кончуг өйүнде болган. Огородтан ногаа аймаан чыып, картофельди каскан.
Бүгү-делегейниң улуг назылыглар хүнүн уткуштур «Тимуржу дуза» акцияга идепкейлиг киржирин Кызылдың 9 дугаар гимназиязының үстүкү классчылары кыйгырып турар.
