Россияның Даштыкы херектер яамызы 2026 чылдың августа Тывага болуп эртер IV делегей чергелиг буддийжи шуулганга белеткел ажылдарын дүүштүреринге тускай төлээни томуйлаар.
Тываның Баштыңы Владислав Ховалыг биле Россия Федерациязының даштыкы херектер сайыдының оралакчызы – статс-секретары Евгений Ивановтуң ужуражылгазының үезинде ындыг шиитпир хүлээп алдынган.
Россияның Даштыкы херектер яамызынга болуп эрткен ужуражылга IV делегей чергелиг буддийжи шуулганның организастыг болгаш дипломатчы деткимчезинче кол кичээнгейни угландырган. Баштайгы медээлерден алырга, бо хемчегге Моолдан, Кыдаттан, Индиядан, Непалдан база Мурнуу-Чөөн Азия чурттарындан шажын башкылары, эксперттер болгаш аалчылар кээп киржир.
«Ындыг хемчегни организастаары дыка хөй нарын айтырыгларны негеп турар, ынчангаш федералдыг албан чериниң деткимчези биске чугула херек. Евгений Сергеевич келир чылын болур шуулганга улуг сонуургалын илередип, Россияның Даштыкы херектер яамызының талазындан шуулганның шупту чадаларда – белеткелден эгелээш, хемчегни эрттиреринге чедир бүгү талалыг деткимчени көргүзерин дыңнаткан. Ол ышкаш шажынчы шуулган-биле холбашкан кол айтырыгларны шиитпирлээринге деткимче көргүзер тускай төлээни томуйлаан» – деп, Владислав Ховалыг чугаалажыышкыннар соонда бодунуң телеграм каналынга дыңнаткан.
Тываның Баштыңы чурттар аразының гуманитарлыг харылзааларын быжыглаарынга болгаш республиканың туружун бараалгадырынга улуг ужур-уткалыг болуушкунче кичээнгейни угландырганы дээш, РФ-тиң даштыкы херектер сайыдының оралакчызы – статс-секретарь Евгений Ивановка четтиргенин илереткен.
