Бөгүн «Тыва: Агроинвест-2025» шуулганның кол хүнү. Кызылда Аныяктар ордузунга дөрт аңгы шөлчүгешке Россияның регионнарындан Моолдан, Кыдаттан база Беларусь Республикадан адырның эксперттери болгаш лидерлери агротехнологияларда боттарының арга-дуржулгазын үлешкен.
Рыноктуң кол төлээлери – бүдүрүкчүлер, инвесторлар, технология компаниялары, сайгарлыкчылары киржип, суггаттыг чер ажылын хөгжүдериниң угланыышкыннарын, мал чиир культураларны тарып өстүрерин, мал-маганны одарладыр аргаларны, ээн одар-белчиирниң үрелиишкиннеринге удур хемчеглерни, эът болгаш балык үлетпүрүнүң хөгжүлдезин, бойдус байлааның болбаазырадылгазын база көдээ болгаш аңнаашкын туризмин сайзырадыр арга-шинекти сайгарган.
Тываның Баштыңы Владислав Ховалыг инвестиция шуулганын ажыдып, бо чылын республиканың чоокку алды чылда агроүлетпүр комплекизиниӊ деткимче хемчеглерин ооң чарлыы-биле тодараттынганын дыңнаткан.
Мал ажылы Тываныӊ көдээ ажыл-агыйыныӊ кол адыры болуп турар. Агроүлетпүр комплекизиниӊ ниити продукциязыныӊ хемчээлиниӊ 80 хуузу болур.
Мурнады боттандырар угланыышкыннарның бирээзи – шээр малдың баш санын камгалап арттырары база көвүдедири, амгы үениң өстүрүп-ажаар болгаш семиртип-азыраар технологияларын ажыглап “тыва хой эъди” ылгавыр демдектиг эъттиң шынарын бедидери, эътти шынарлыг ажыглаары.
Тываның экономиказында хой ажыл-агыйы чугула рольду ойнап турар болгаш, көдээ кожууннарның чаагай чоруун база чоннуң амыдырал-чуртталгазының өзээ болуп чоруурун көдээ ажыл-агый болгаш аъш-чем сайыды Юрий Оруспай демдеглээн.
Уксаалыг аныяк малды садып ап база тарып боозадылганы ажыглап тургаш, Тывада шээр малдың тыва фондузун деткип, күрүне деткимчезиниң хемчээлин улгаттырарынга нормативтиг баазаны сайзараңгайжыдар ужурлуг. Ол ышкаш хой болгаш өшкү өстүрүп көвүдедир инвестиция төлевилелдерин, малдың продукциязын болгаш күш-шыдалын экижиткен ажыл-агыйларны деткиир.
Хүннүң бирги чартыында он ажыг инвестиция дугуржулгазынга аттар салдынган.
Россияның регионнарындан болгаш тус черниң бараан бүдүрүкчүлери продукциязын делгээн.
Чуруктарны Буян Ооржак тырттырган
