Тываның А. С. Пушкин аттыг национал ном саңынга чурт-шинчилел чогаалы болгаш национал библиография килдизиниң ажылдакчылары «Чылыг сөстүң одаа» бөлгүмге ээлчеглиг «Тыва дыл амгы үеде» темалыг хемчегни эрттиргенин ном саңы дыңнаткан.
Тываның гуманитарлыг болгаш тускай социал-экономиктиг шинчилелдер институдунуң башкарыкчы эртем ажылдакчызы, филология эртемнериниң кандидады Надежда Серээдар, Национал школа хөгжүдер институттуң биче эртем ажылдакчызы Чочагай Хомушку, Тываның күрүне университединиң даштыкы дыл башкызы Тайгана Назынчап, Кызылдың 1 дугаар ортумак школазының 9 «в» клазының өөреникчилери хемчегге идепкейлиг киришкеннер.
Тыва дылдың сагыыр ужурлуг дүрүмнери сагыттынып турар бе? Тыва дылывысты кайы хире хумагалап, хүндүлеп турар бис? Делегей четкизиниң тыва дылга салдары, социал четкилерде частырыглар кайы-кайы сөстерде хөйү-биле таваржып турарыл дээш, оон-даа өске айтырыгларны киржикчилер чугаалашкан.
Дыл – кажан-даа, каяа-даа эң чугула чепсек. Тыва дыл дээрге бистиң үе-дүптен бээр бурунгу чонувустуң, өгбелеривистиң чүс-чүс чылдар дургузунда аралажып-чугаалажып келген дылы-дыр. Тыва дылывыс катаптаттынмас байлак, чараш аялгалыг, онзагай дылдарның бирээзи.
Школачылар база номчукчулар тыва дылга хамаарышкан ажыктыг чүүлдерни билип алганынга четтиргенин илереткен.
