Амгы үеде Тываның элээн каш муниципалдыг тургузугларында чаа школаларны деңге тудуп турар. 2024 чылга чедир уламчылаан «Өөредилге» национал төлевилелдиң күүселдези-биле чаа школалар тудуглары эгелээн.
Президентиниң «Аныяктар болгаш уруглар» деп чаа национал төлевилелиниң сорулгалары болгаш шиитпирлери-биле бо чылын ол тудуг ажылдары уламчылаан. Тываның Баштыңы Владислав Ховалыг регионнуң Өөредилге яамызынга көдээ школаларда кадрларны хевээр арттырып, чаа албан черлерин башкылар-биле хандырарын дааскан.
Кызыл кожууннуң хоорай хевирлиг чурттакчылыг чери Каа-Хем суурда, Таңды кожууннуң Бай-Хаак суурда, Кызыл хоорайның ийи микрорайонунда 825 олуттуг школаларны тудуп турар. Чадаана хоорайда 616 олуттуг, Улуг-Хемниң Чодураа база Мөңгүн-Тайганың Кызыл-Хая суурларында 176 олуттуг ниити өөредилге албан черлериниң тудуу доозулган.
– 2024 чылга чедир ажылдаан «Өөредилге» национал төлевилелдиң ачызында бистиң республика өөредилге инфратургузуун элээн экижиткен. Ам ол ажыл «Аныяктар болгаш уруглар» деп чаа национал төлевилел боттанылгазы-биле чоруп турар – деп, Владислав Ховалыг бодунуң блогунда бижээн.
Тываның Баштыңы чаа школаларга ажылдаар күзелдиг башкыларга «ажык эжиктер» хүннерин организастаарын ТР-ниң Өөредилге яамызынга даасканын дыңнаткан. Өске көдээ школалар шыырак кадрларын чидирбес кылдыр ол ажылды организастаар херек деп, Владислав Ховалыг айыткан. Ынчангаш Өөредилге болгаш эртем яамызы башкыларның чаа коллективтерин четчелээр ажылды муниципалдыг тургузуглар-биле кады чорудар ужурлуг.
Өөредилге яамызы чаа школаларның кадрлар хандырылгазының айтырыын тудуглар эгелээнинден чорудуп турарын демдеглээн: «Чеже башкы херегин санаан, хостуг олуттарже документилерни хүлээп ап турар. Чурттуң педагогика угланыышкынныг дээди өөредилге черлериниң студентилери-биле айтырыгны шиитпирлээри көрдүнүп турар. 2025 чылда университет дооскан аныяк башкылар «Мээң башкым» төлевилелдиң боттандырганы «Мен – башкы мен» төлевилели-биле чаңгыс удаа саң-хөө деткимчези бээр мөөрейге киржип, чаа школаларга ажылдаар кылдыр кээп болур» – деп, албан чери дыңнаткан.
